Naak Qeqertarsuup Tunuani issittormiut aasarinnersuat qallingaluartoq, Kommune Qeqertalimmi innuttaasunut takornarissanullu assigiinngitsunik susoqartitsinissat illoqarfinni assigiinngitsuni neqeroorutigineqartuarsinnarput. Tamakkulu Qeqertalik Business Councilimit kiisalu Destination Diskobayimit peqataaffigineqassamaarputtaaq. Ataani septembarip tungaanut Qeqertalimmi pisussat annerumaat ingerlanneqartussat takuneqarsinnaapput.

Juuni

• Aasianni Saligaatsoq 9. juni / Qasigiannguani 14. juni: Aasianni Destination Diskobay, CSR Greenland peqatingalugu saleersuarnissamik aaqqissuusseqataavoq. Innuttaasut suliffeqarfiillu peqatingiillutik avatagiisitsinnik eriaginninnissaq siunertaralugu aqqusinerni eqqakkanik katersissapput. Tamannalu juunip 14-ani Qasigiannguani aamma ingerlalluarnissaanik neriuuteqarluta aaqqissuunneqarumaarluni, kiisalumi juunip ingerlanerani nunaqarfinni aamma arlaariinni saliisoqarumaaluni.
• Juunip 21-ani – Inuiattut Ullorsiorneq – Illoqarfinni tamani malunnartinneqarumaarpoq.
• Juunip 24-ani – Aasiaat Midnight Sun Marathon: Arpatsitsineq unnukkut ingerlanneqassaaq, tamannalu seqernut kaaviinnalersup ataani illoqarfik sisamariarlugu kaajallanneqarluni aqqutigineqarumaarluni. Arpatsitsinerit assigiinngitsut sisamat periarfissaajumaarput, tassaasut 4,2 km, 10,5 km, halvmarathon 21 km kiisalu marathon 42,1 km.
• Juunip 25-ani – Aasiaat Nuan’: Midnight Sun Marathonip aqaguani Aasianni pikialaartitsineq, ima taallugu Aasiaat Nuan’ ingerlanneqassaaq, tassanilu meeqqanut ilaqutariinnullu pisussaqartitsisoqarumaarluni.

Juuli

• Juulip 8-9-anilu – Qeqertarsuaq Festival: Qeqertarsuarmi nipilersornikkut tusarnaartitsisoqarumaarpoq, nipilersortartut assigiinngitsut tusarnaarsinnaaneqarumaarlutik.
• Juulip 9-ani – Food festival: Nipilersorlutik tusarnaartitsisoqarnerita saniatigut Qeqertarsuaq Food Festival misigineqarsinnaavortaaq, tassanilu sassaalliutit sumiiffimmeersut misilinneqarsinnaajumaarlutik.
• Juulip 8-10-anilu – Qeqertarsuaq Race: Ullut pingasut iluani Qeqertarsuarmi avatagiisitsinni qaqqakkullu arpatitsineq ingerlanneqassaaq. Peqataasussallu ilaatigut qaqqami unnuisarumaarput, illoqarfimmilu tikinnersiorumaarlutik.
• Juulip 30-ani Qasigiannguani – Kulunnguaq Run: Arpatsitsinerit takissutsit assigiinngitsut, kinguneranilu pikialaartitsineqarlunilu tusarnaartitsisoqarumaarluni. Kulunnguaq tassaasimavoq Otto Rosingip atuakkiaani assinganik atilimmi inuttaasoq pingaarneq. Tassanilu atuakkiami Kulunnguup nunaqarfimminiit Qasigiannguanut qimaalluni arpaffigisimasaa ilaatigut malinneqarluni ingerlanneqassalluni.

Juulimi aggustusimilu Inuussutissarsiutitigut Siunnersuisarfik Qeqertalimmi nunaqarfiit tikeraassamaarpaat, tassanilu innuttaasut naapeqatingalugit, inuussutissarsiutitigut takornariartitsinikkullu tunngassuteqartunik oqaloqatigiissuteqarumaarlutik.

Aggustusimi amerlasuut suli aasaanerani sulinngiffeqarfigisarpaat, tassanilu aaqqissuussanik pisoqartitsisoqarpallaarunnarnani, taamaakkaluartorli suli Qeqertarsuup Tunuani misigisassanik ulikkaarpoq. Nittartagarput www.diskobay.gl aggustumi misigisassarsiornissannut alaatsinaaffingalugu alakkariuk.

Septembari

• Septembarip 2-3-anilu Nipiaa Rock Festival – Aasiaat: Timersortarfik rockfestivalimi tusarnaartitsinissamik pisussanik sinaakkusersuissaaq. Festivali ukiuni 20-ni nunatsinni nipilersortartut nuimasut arlallit tusarnaartitsisarput (annerusumik FB-mi qupperneranni maana paasisaqarit).
• Septembarip 3-ani Aasiaat Nuan’ – Aasiaat: Nipiaa Rock Festival ingerlanneqarnerata saniatigut illoqarfimmi pikialaartitsisoqassaaq, meeqaanut ilaqutariinnullu susassaqartitsisoqarumaarluni.

Ukiaanerani Qeqertalik Business Council pikkorissaanerit, workshops susassaqartitsinerillu allat Qeqertalimmi neqeroorutigisaleqqissavaat.