Nammineq aningaasaateqareerneq iluaqutaagaatsiartarpoq, pingaartumik allanik aningaasaleeqataasussarsiornermi, atorniarnermi, taperserneqarniarnermi il.il.

Nammineq isertitaqartarnerniit ileqqaarisinnaavutit eqqarsaativit inerikkiartornissaata ilutingalugu, imaluunniit sipaangaqareeruit illuuteqaruilluunniit isumannaarutaasinnaasumik siuarsimareersinnaavutit

Aamma katersuiniarnissamik aaqqissuussisinnaavutit, suliffeqarfissavit taperserneqarsinnaanissaanut inunnik oorinik tunniussaqarsinnaasunik qaaqqusillutit. Assersuutingalugu piginneqataasinnaanermik neqerooruteqarnikkut, nioqqutissiaatinnik tapersersuisussanut akisunaaraluni tunniussaqarnikkut, sponsorinik nittarsaassanissamik neriorsuinikkut, crowd-funding sunaluunniit… nutaalioriarit!

Bootstrapping kalaallisut nassuiarneqarsinnaavoq “sippartunertut”, tassa aningaasanik atuinerusinnaasut suullunniit avaqqunnikkut. Taamaasillutit aallartisaanissamut sipaarnikkut katersilluarsinnaanerullutit, isertitatillu kisiisa atorlugit nammineersinnaanerullutit.

Bakers method ima nassuiarneqarsinnaavoq;  Ataatsimik qaqortulialiornikkut tunisaqarnikkullu, aningaasat isertitatit atorlugit panakaassiassarsiuteqalernikkut marlunnik qaqortulialiorsinnaalerlutit, taamatullu nutaanik sanaqqinnikkut amerliartuaartillugit isertitsinerulersinnaallutit.

Tamatuma iluaqutaa tassaavoq, siunissamut arlaannaanulluunniit utertitsisariaqannginnavit, tassami nammineq katersaraatit avitseqateqartariaqarnallu.

Oorinik atorniarnermi aqqutissaakkajuttarpoq.

Atukkerneqarneq eqqaassaanngikkaanni banki aamma siunnersuilluartarmat soqutiginaateqarluinnarpoq.

Bankili atukkiineq ajorpoq uterteqqinneqarnissaanut isumannartoqartillugu, taamaattumik tusarnaarluarnissaat pingaaruteqarpoq.

Bankimiillu pisortatigoortumik atukkerneqarsimareertilluni, matut allat periarfissaassut aamma ammaanneqaratartarput, taakkunanngalu aamma tapersersorneqarsinnaaneq pisinnaasarluni.

Business angel taaguutaavoq niuertumik pisoorsuarmik aningaasaliiffigineqarluni tapersersorteqarnermut, taassuma nammineq aningaasarsiutissamisut aningaasaliiffigissavaatit, sulifeeqarfivillu ineriartornissaanut suleqataassalluni.

Amerlasuutigut namminneq piginnaasatik attaveqaatitillu atorluarlugit suliffeqarfimmut ineriartortitseqataarusullutik ilannguttarput. Amerlasuutigullu suliffeqarfimmik piginneqataanissartik piumasarisarpaat, kingusinnerusukkut piginneqataassusertik naleqarnerulerpat iluanaarutingalugu tuneqqissinnaasarlugu. Business angel aningaasaliiniaraangamik 250.000 – 2 millionit koruunit akornanni aningaasaliikkajuttarput, namminnerlu piffissartik piginnaasatillu neqeroorutigisarlugit, tamannalu ukiuni 3 – 5 sivisussusilimmik peqataarusussinnaasarlutik.

Ajoraluartumillu nunatsinni business angelinik pisortatigoortumik nalunaarsorsimasoqanngilaq.

Sweat equity tassaavoq inuit aningaasaliinngikkaluarlutik suleqataanermikkut suliffeqarfinnut tapeeqataasartut, ilaatigullu taamaasillutik piginneqataalersinnaasarlutik.

Suliffeqarfinnut amerlasuunut nukiit piginnaasallu eqqortut suliffeqarfimmut ilanngunnerisigut, ingerlanneranut piginnaanermik ineriartornermillu kinguneqartitseratartarpoq.

Tamannalu aallarnisaasunut aningaasaatilissuunngitsunut akissarsiaqartitsisinnaanngitsunullu pisariaqarsinnaasarluni.

Eqqumaffigineqartariaqarporli piginneqatiginnissummik akikinaarillu tunniussinnginnissaq, tassami piginneqataalersussaq piffissami isorartuumi suliffeqarfimmut naleqassutsimik tunniussisinnaasariaqarmat.

Factoring tassaavoq akiligassat nassiunnikut suliffeqarfimmut allamut akiliisitsiniartartumut tunineqarsinnaaneri, taakkulu namminneq atuisumut/sullitamut akiligassinneqarnikunut aningaasat utertinniartussaassavaat.

Taamaasiornerup iluaqutigivaa, akiligassat nassiunneqarnikut naligi akilerneqarnissai utaqqiinnarnagit, ingerlaannartumik aningaasat tigussagakkit, pappialarsornerujussuarlu taamaasillutit avaqqutissallugu.

Fakturanik pisisup soorunami akiligassat naligi tamakkiisumik akilissanngilai, tassami namminneq aamma aningaasarsiniutigissagamikkit.

“Pingaartumik suliffeqarfinnut aallarterlaanut fakturanik tunisaqarneq soqutiginaatilerujussuuvoq, taakkuukkajuttarmatami aningaasatigut piaartumik pisariaqartitsisartut” – taama oqarpoq Juri Cetti, Co-founder, Dansk Faktura Børs A/S-imiit.

Attaveqaatitigut aningaasanik taperneqarneq siaruarterlualereernikuuvoq, tassanilu imaappoq portal aalajangersimasoq aqqutingalugu annikikkaluamilluunniit aningaasalerneqarneq/taperneqarneq amerlasoorpassuarnik ingerlanneqartillugu aningaasanik amerlasoorsuarnik aallartisarnissamut pisariaqartitanut katersissutaasinnaasarmat.

Periarfissat assigiinngitsut nittartakkatigut takussaapput, ilisimaneqarnerpaallu ilagaat Kickstarter.com taavalu GoFundMe.com.

Nittartakkat taakku takoqqusaarusiornermik aamma ikiuutaasinnaasarput, kisiannili ilisimaneqassaaq suliffeqarfiit amerlasoorpassuit aamma tassuuna unammillertarmata.

“Crowdlending suliffeqarfinnut minnerumaanut aallartisaatissatut katersuiniarfiginissaanut pisariillunilu orniginartupilussuuvoq…” – taama oqarpoq Nils Thygesen, Partner i Lendino A/S-imiit.

Sullitavit/atuisuvit suliffeqarfinnut tapeeqataasinnaanerat aamma periarfissaavoq, tassanilu pineqarpoq suliffeqarfivit alliartorsinnaanera atuisut/sullitat aningaasaataat atorlugit.

Aningaasatigut avitseqateqarsinnaanermi periarfissat ilisimaneqarnerpaat ilaat tassaapput Airbnb.com, aamma ”siumoortumik akiliuteqarfiusoq” Threadless.com. Kiisalu periarfissaalluni atuisuuffeqartitsinikkut sullissineq.

Tamannalu aallartisaanermi piukkunnaateqarluarpoq, taamatummi Bill Gates (Microsoft) kiisalu Michael Dell (Dell computers) aallartissimapput.

Michael Dellip qarasaasiaq tamakkiisoq siumoortumik tunereerlugu, inuit qarasaasiasa atortugissaarutai kingusinnerusukkut pisiarisarsimavai, Bill Gatesillu qarasaasiamut programmit sanaqqaarlugit aallartissimavoq, kingusinnerusukkullu inunnut programmikkaarlugit tuninialersimallugit.