Canadami ataatsimeersuarneq PDAC-mik taaneqartoq Torontomi ingerlanneqaqqammerpoq. Matumanilu Qeqertalik Business Council peqataavoq, immikkoortortaqarfitsinni niuerniarnissamut matut ammasut naqissuserumallugu.
PDAC tassaavoq aatsitassarsiornermut soqutigisallit ataatsimeersuartarfigisaanni nunarsuarmi annerpaaq, matumanilu nunarput siammasissumik peqataatitsivoq. Peqataasut 65-t tungaanut pisortaniit inuussutissarsiuteqartuniillu aallartitaqarput, ilaatigut Aatsitassanut Naalakkersuisoq kiisalu Inuusutissarsiornermut Naalakkersuisoq peqataasimallutik.
”Qeqertalik Business Councilimiit peqataanitta toqqammavigai aatsitassarsiornermik sulialinnik, immikkoortortaqarfitsinnilu soqutiginnittunik imaluunniit pioreersunik, qaninnerusumik suleqateqalersinnaaneq annertusaaffigerusukkatsigu” taama oqarpoq Inuussutissarsiutitigut Siunnersuisoqarfimmi pisortaaneq Gerth P. Olsen, sapaatip akunnerani uani Torontomi aamma peqataasoq. Nangipporlu:
”Ataatsimeersuarnermi taama annertutigisumi peqataanerput, Qeqertalimmi immikkoortortaqarfitta ilisaritilluarnissaanut toqqammaviulluartariaqarpoq. Taamaattumik nunani tamalaaniit nunatsinniillumi soqutiginnittunik annertunerusumillu paasisaqarusuttunik oqaloqateqarpunga, kiisalu siunnersuisoqarfitta qanoq atorluarneqarsinnaanissaanut periarfissanik taakkartueqatigiilluta”
Qeqertarsuarmi aatsitassarsiorniat nutaat attaveqaqatigiiffigineqalersut
Suliffeqarfik Qeqertarsuarmi aatsitassarsiornissaminnut akuersissummik peqalereersoq attaveqaqatigiiffigineqalerpoq. Matumanilu Qeqertalik Business Council suliffeqarfiullu qanimut suleqatigiissinnaanerat naapertuulluarpoq, tassami Siunnersuisoqarfik immikkoortortaqarfimmi attavitik ilisimasatillu tunngavingalugit siunnersuinermikkut tapersiilluarsinnaajumaarmat. Aatsitassarsioqatigiiffik Nikkili Greenland A/S ukiuni tulliuttuni nikeriarfinni arlalinni, nunani tamalaaneersunik aningaasaliiffigineqareersimavoq, ilaatigut aningaasaatilissuarnik Bill Gatesimit Jeff Besozimillu – uani aannertunerusumik paasisassarsiorsinnaavutit.
Qeqertalik Business Councilip taamaasilluni PDAC-mi ataatsimeersuartitsinermi nunat tamalaanit nunatsinniillu soqutigisaqaqatigiinnut, immikkoortortaqarfitsinni niuerniarnissamut matut ammasut naqissuserpaa.
