Upernaaq 2022 ingerlanerani Qeqertalik Business Council kommuneqarfiup iluani inuussutissarsiutillit takornariaqartitsisullu isumasiornerisigut siunnersuutinik kissaatinillu katersisimavoq. Taakkulu Qeqertalimmi kommunalbestyrelsemut kommunip 2023-mut missingersuusiassaanut siunnersuutitut innersuussutigineqarlutik tunniunneqareerput.
Upernassaq Kommune Qeqertalimmi inuussutissarsiutillit takornarialerisullu 40-t missaanniittut illoqarfimminni pitsannguutissanut siunnersuutinik Qeqertalik Business Councilimut tunniussaqarsimapput. Tamannalu isumasiuisitsinerni Aasianni, Kangaatsiami, Qeqertarsuarmi kiisalu Qasigiannguani ingerlanneqartuni, Inuussutissarsiutitigut Siunnersuisoqarfiup qaaqqusissuteqarsimanerisigut pisimalluni.
Tassanilu kommuneqarfiup illoqarfianni pitsaanerusumik najungaqalernissamut, suliffeqarfimmik ingerlatsinissamut kiisalu takornariarfissaqqissuunissaanik aallussinissamut siunnersuutaallutik. Siunnersuutit tamarmik, Kommune Qeqertaliup politikkikkut naleqqiussaanut tulluarsangaallutik.
Missingersuusiornerup ingerlarnganut ilannguttut
Qeqertalik Business Councilip isumasiuereernerup kinguninnguani innuttaasuniit siunnersuutit katitersimavaat. Aasaaneranilu sulinngiffeqanngitsiarnerup sioqqutilaarnerani Inussutissarsiutitigut Siunnersuisoqarfiup 2023-mut missingersuutissanut Qeqertalimmi kommunalbestyrelsemut innersuussutissatut tunniunneqarsimallutik.
Inuussutissarsiuteqartuniit siunnersuusiarineqarsimasut tassaanerusimapput nunap sanaartukkatigut aaqqissuunneqarneranut kiisalu sukisaarsaatissanut tunngassuteqartut. Siunnersuutaasut ilaat siumungaaq isingaluni inaarsaatissatut suliassaapput, ilaalu aningaasaliissuteqalaarnikkut imaaliallaannaq pilersinneqarsinnaallutik. Siunnersuutaasullu amerlanerusut immikkoortortaqarfitsinnut nukittuallaatissatut 2024-mi Ilulissani mittarfittaarsuaqalernissamut kiisalu takornariaqalernerunissamut piareersaataasussaallutik.
Piorsarsimassuteqarnermik kivitseqataasussaq
Isumasiuisitsineq ummaarinnerpaamik ingerlanneqarsimasoq tassaasimavoq kommunip illoqarfiata minnerpaartaani Kangaatsiami pisoq. Tassani peqataasunit Kangaatsiap piorsarsimassutsikkut pisuussuterpassuinut tunngassuteqartunik siuarsaaqataasussanik ukkataqarsimapput. Innersuussallu ilagisimavaat illoqarfimmi kulturcentereqalersinnaaneq, soorlu aamma sanaluttarfiup pioreersup iluarsaassiffigineqarnissaanik siunnersuuteqartoqarsimasoq, tamakkulu inuussutissarsiuteqarnermut kiisalu kingusinnerusukkut takornariaqarnissamut iluaqutaasussaassallutik.
”Kangaatsiami isumasiuisitsinermi siunissaq ungasissoq isigalugu illoqarfimmik kivitsinissaq immikkut isiginiarneqarsimavoq. Illoqarfimmilu innuttaasut piorsarsimassutsikkut kingornussat aamma tigussaanngikkaluartulluuniit tulluusimaarutingalugit katersorneqarlutillu ineriartortinneqarnissaannut innersuussuteqarputtaaq. Tamannalu illoqarfimmik kivitseqataalluarumaarpoq, aamma inuussutissarsiuteqarnup iluani maluginiarneqarumaartoq,” taama oqarpoq Gerth P. Olsen Qeqertalik Business Councilimi pisortaaneq.
Periarfissanik pitsanngorsaaneq
Qulaani eqqaaneqareersut avataatigut kommunip illoqarfiani allani siunnersuutaasimasut ilagaat pisulluni aqqutissanik tummeqqianillu ilaartuinissaq, sukisaarsaatissaqartitsinerit, illoqarfinni anartarfinnik pilersitsinerit allarpassuillu. Tamarmik illoqarfitsinnit pitsanngorsaataaqataasussat innuttaasunullu periarfissiisussat.
”Inuussutissarsiutitigut Siunnersuisoqarfimmiit nuannaarutingaarput, inuussutissarsiuteqartut taama amerlatigisut isumasiuisitsinitsinni peqataasinnaasimammata, tulluusimaarutingalutigullu kommunalbestyrelsemut innersuussat ingerlateqqissinnaasimagatsigit. Maannakkullu pissanngatigissavarput kommunip aappaagumut missingersuusiaanni innersuussutigineqartut sorliit ilanngunneqarumaarnersut,” taama oqarpoq Gerth P. Olsen.
Kommunalbestyrelsemut innersuussutaasimasut tamarmik takuneqarsinnaapput.