Sapaatip akunnera 30-mi Qeqertalik Business Council Amerikap Nuummi aallartitaqarfianiit Kommune Qeqertalimmi tikeraartoqarnerani aaqqissuusseqataavoq. Tikeraartoqarnermi USA-p Qeqertaliullu immikkoortortaqarfimmi sutigut ineriartortitseqqinnissamut periarfissanik suleqatigiinnerulernissamik aningaasaleeqataaffiusinnaasunillu ujartuissallutik illugiimmik qanimut oqaloqatigiissuteqarput.
Amerikamiut Nuummi aallartitaqarfianiit, Nunatsinni Ineriartortitsinermi Siunnersortaaneq, Elizabeth Feary, U.S. Agency for International Development (USAID)-miit, uani sapaatip akunnerani tikeraarnermini Aasiaat Qeqertarsuarlu tikeraarpai. Matumanilu Qeqertalik Business Council aaqqissuusseqataavoq.
”Kommune Qeqertalimmut tikeraarnera pissarsiaqarfigilluaqaara. Tamannalu Amerikap tungaaniit, USA-p Kalaallit Nunaatalu nukittunerusumik attaveqatigiinnerulersitseqataaffigisinnaanera nuannaarutigaarput. Qeqertalimmilu tikeraarnitta periarfissanik amerlanerusunik qanorlu annertunerusumik suleqatigiiffiusinnaanerannik pilersitsivoq.” taama Elizabeth Feary tikeraarnerminut tunngatillugu oqaaseqarpoq.
Sapaatip akunneranata aallartinnerani, Elizabeth, kommuneqarfimmiit kiisalu Aasianni inuussutissarsiutillit peqatingalugit, aatsitassarsiortitseqatigiiffiit marluk Diskop Qeqertaani aatsitassarsiornissamut aallarniutaasumik misissuinissaannut tunngatillugu, internetsikkut peqataallutik saqqummiussisut ataatsimeeqataaffigai.
Qeqertarsuarmi periarfissiineq
Angalanermi Qeqertarsuup illoqarfia aamma tikeraarneqarpoq, matumanilu illoqarfimmi inuussutissarsiutillit ataatsimeeqatigineqarlutik. Kiisalu Angakkussarfik Arktisk Station, aamma Kuannit Art suliaannit pilersaarutaannillu paasisaqarfigineruniarlugit pulaarneqarlutik.
”Assorsuaq nuannaarutigaarput amerikap aallartitaqarfianniit Aasianni Qeqertarsuarmilu inuussutissarsiuteqartut, aqutsisut, eqqumiitsuliortut ilinniartitsisullu naapeqatiginissaat pingaartissimammassuk. Tamanna aallartitaqarfiup immikkoortortaqarfitsinniit periarfissanik ilisimasaqarnerulerneranik kinguneqarpoq. Taamasillunilu nunaqartut amerikap nunattalu peqatigiinnerannut tunngasunik annertunerusumik ilisimasaqarnerulerlutik,” taama tikeraartoqarnerminut tunngatillugu oqarpoq, Qeqertalik Business Councilimi pisortaaneq Gerth P. Olsen.
Aasianni misiliummik suliniut alakkaaffigaa
Amerikap aallartitaqarfiata tikeraarneranut aamma siunertaasut ilaat, Gammeqarfimmi atuarfiup aallarteqqinnerani misiliummik suliniutaalluni pilersinneqalersoq alakkaaffigaa.
Tassami USAID-ip Fonden for Entreprenørskabip suliniutaasa ilaat aningaasaleeqataaffigisimavaat, tamannalu nutaaliorsinnaassutsip meeqqat atuarfianni ilinniartitaanerannut eqqunneqarnissaanut tunngassuteqarpoq. Uuma suliniutip atuartut nutaaliorsinnaanerannut isumassarsiorsinnaanerannullu nukittorsaataasussaavoq. Taamaattumillu Elizabeth Fearyp atuarfik pulaarumasimavaa, ilaatigullu atuarfimmi periarfissat atuarfiullu oqaluttuassartaa paasisaqarfigisimallugit.
USA-mut nukittunerusumik attaveqalerneq
Elizabeth Fearyp Aasiannut tikeraarnermini Qeqertannguaq kiisalu Tupilaap qeqertaa tummarpai, tassanilu ilaatigut sorsunnersuup aappaata nalaani amerikamiut Aasianni baseqarfigisimasaat alakkaaffigisimallugit (annerusumik base pillugu uani atuagaqarsinnaavutit https://diskobay.gl/adventures/adventures/culture-and-stories-from-disko-bay/transit-island-in-aasiaat/).
”Tikeraartoqarnerput Amerikap aallartitaqarfianut qaninnerulersitsivoq, taamatuttaarlu ataatsimut isingalugu USA-mut qaninnerulersitsilluni. Tamannalu nuannaarutigeqaarput, tassami periarfissanik aningaasaliisinnaassutsinillu nutaanik, minnerunngitsumillu nunatsinnut illuttut akimut suleqatigiiffiusinnaasunik immikkoortortaqarfitsinni inuussutissarsiutilinnut iluaqutaasinnaasunik pilersitseqataaffiummat.” Taama Gerth P. Olsen naggasiivoq.
