Qeqertalik Business Council sapaatip akunnerata naanerani Nuummi Nalik Ventures aaqqissuussaani Advisory Boardimi peqataalluni ataatsimeeqataavoq. Ukiuni kingullerni marlussunni sinerissami inuussutissarsiutitigut siunnersuisoqarfiit allat peqatingalugit, sinerissami kiisalu nuna tamakkerlugu inuussutissarsiutitigut atugassarititaasut sinaakkutassarititallu pitsanngorsartuarnissaat siunertaralugu suliniuteqalerput.
Isumasiueqatigiinnermi Nalik Ventures qaaqqusisuulluni ulluni marlunni ataatsimiisitsinermik aaqqissuussaqarpoq, tassanilu saqqummiussanik soqutiginartunik arlalinnik namminneq tunniussaqarput, ilaatigut aningaasaliisinnaanermut periarfissat eqqartorneqarlutik, nunani allanit suliniutit nunatsinni aallarnisaanermut iluaqutaasinnaasut taakkartoneqarlutik, qinnuteqaasiornermi periutsit kiisalu nunatsinni aallarnisaanermik suliaqartunut ikiuutissaq Kick Startimik taaneqartoq ilisaritinneqarluni.
Saniatigut sinerissamiit Inuussutissarsiutitigut Siunnersuisoqarfinneersuusugut nammineq suliatsinnik saqqummiisinneqarpugut, tassanilu ilaatigut immikkoortortaqarfitsinniit periarfissat kiisalu unamminartuutaasinnaasut eqqartorneqarlutik.
”Nuannaarutigisaqaara sinerissami Inuussutissarsiutitigut Siunnersuisoqarfinniit suleqatigut naapeqatigisinnaasaratsigit, kiisalu Nalik Ventures peqatingalugu ataatsimoorussamik nunatsinni inuussutissarsiornermik siuarsaaneq anguniangaqataaffigisinnaasaratsigu. Immitsinnut isumassorsinnaasarnerput misilittakkatsinnillu avitseqatigiiffiusinnaasarnera pingaarutilittut isigaarput, kiisalu ataatsimoorluta suleqatigiinnikkut nukitsorsaqatigiittuaannarsinnaasarnissarput anguniartarlutigu”. Taama Qeqertalik Business Councilimi pisortaaneq, Gerth P. Olsen oqaaseqarpoq.
