Vestnordenfondenip pisortaa Bjartur Nolsøe, ippassaq 17. april 2024 20-init ikinnerunngitsunik najuuttunik onlinekkullu malinnaaffigineqartumik paasissutissiiffiulluartumillu saqqummiivoq.
Saqqummiineq uani takoqqinneqarsinnaavoq: Bjartur Nolsøep Vestnordenfonden pillugu saqqummiinera
Aningaasaateqarfik Vestnordenfonden Kalaallit Nunaanni, Savalimmiuni ilaatigullu Islandimi suliffeqarfinnut mikisunut akunnattumillu angissusilinnut sullissisarpoq. Islandimili suliffeqarfinnut aningaasanik atortitsissaguni, suliffeqarfinnik Savalimmiuneersunik Kalaallilluunniit Nunaanneersunik suleqateqaqqaartoqartariaqarpoq.
Aningaasaateqarfik arfineq-marlunni ilaasortaqarpoq, taakkulu atorniartitsinermi aalajangiisuusarput. Aningaasaateqarfillu suliffeqarfinnik ineriartortitsinissamik siuarsaasuuvoq. Ilaatigut Vestnordenfondenip suliffeqarfiit atorniartitsisartunit allanit atorniarnissaminnik ajornakusoortitsisut atorniartissinnaanerat neqeroorutigisarpaa.
Anpartsselskabiuteqaruit, aktieselskabiuteqaruit, namminersortuaraaguit, interessantselskabiuguilluunniit qinnuteqarsinnaavutit.
Avatangiisinut mianerinnittumik suliniutillit, nutaaliorniartut aningaasaqarnermut patajaallisaasinnaasut, ilinniarfissanik suliffissanillu pilersitsisinnaasut kiisalu kinguaariit nikinnerannik nalaatallit atorniartinneqarsinnaasarneri salliunneqartarput.
Suliffeqarfinnik piginnittut assersuutigalugu umiatsinik, maskiinanik, illuutinik kinguuaariilluunniit nikinneranni ingerlatitseqqiinissamik siunertalinnik aningaasaateqarfik atorniartitsisinnaavoq.
Paasisaqarnerorusukkuit Bjartur Nolsøep mobiilimut +299 55 41 32-mut sianerfigalugu imaluunniit vestnordenfonden@vestnordenfonden.gl -imut e-mailerfigalugu attavigisinnaavat.
Aamma nittartagaat uani nanisinnaavat: www.vestnorden.gl