Juunip qaammataani sapaatip akunnerani siullermi inuussutissarsiorlutik namminersortut suleqatigiillu katersuutsinneqarput, inuussutissarsiornikkut isumasioqatigiinneq quleqqutserlugu “Kommune Qeqertalimmi pimoorussilluni inuussutissarsiutitigut ineriartortitsineq” ingerlanneqarpoq.

Aaqqissuussap siunertaraa suliffeqarfiit akornamminni immikkoortortaqarfiit piffiani suleqatigiinnermik nukittorsaanissaq, matumanilu suliffeqarfiit ataatsimoorussillutik, piffinnilu namminersortut peqatigeqqinnaarlugit, inuuussutissarsiutitigut ineriartortitsinissamut kivitseqatigiinnissaq sulissutigerusummassuk.

“Uatsinnut pingaaruteqarluinnarpoq immikkoortortaqarfinni inuussutissarsiutitigut ineriartortitsinissamut peqataanissarput, kiisalu piffinni innuttaasut periarfissaat pillugit eqqartueqatigiinnissaq pingaartillutigu. Kissaatigaarputtaaq immikkoortortaqarfinni assingiinngitsuni, inuiaqatigiittut akisussaaqataanerput ilutingalugu, nuna tamakkerlugu eqeersaaqataaffiginissaa kivetseqataaffiginissaalu.” Taama oqarpoq Inuussutissarsiornermi Pisortaq Søren Stenberg Grønlandsbankimeersoq.

Aaqqissuussaq una immikkoortortaqarfik kaajallallugu angalaqatigiinnikkut ingerlanneqarpoq, illoqarfiit uku tikenneqarlutik, Aasiaat, Qasigiannguit, Qeqertarsuaq Kangaatsiarlu. Matumanilu sammisaq illoqarfiiit nunaqarfiillu akimorlugit inuussutissarsiutitigut ineriartortitsinissaq nukittorsaanissarlu ukkatarineqarluni.

Isumasioqatigiinnermi ilaatigut saqqummiisuupput Thomas “Tyt” Mogensen, Nalik Venturesip pisortaanera, Christian Keldsen, Sulisitsisut Kattuffiata pisortaanera, Søren Stenberg, Inuussutissarsiornermi Pisortaq Grønlandsbankimiit, kiisalu Gerth P. Olsen, Qeqertalik Business Councilimi pisortaaneq. Saqqummiisut tamarmik immikkut neqeroorutiminnik kiffartuussissutiminnillu ukkataqarlutik saqqummiipput, kiisalu suleqatigiinnissamik, inuussutissarsiutitigut periarfissanik, inuussutissarsiornermilu ineriartortitsinissamut sapiissuseqarnissamik oqariartuuteqarlutik.

“Nuannaarutingeqaarput neqeroorutitsinnik, kiffartuussissutitsinnik periarfissatsinnillu saqqummiisinnaangatta, kiisalu piffinni tikitatsinni namminersortut naapisimaarsinnaangatsigit, ulluinnarnimi taakku timitalerlugu naapissinnaaneq ajoratsigit. Tassami taannarpiaangami piffinni aalajangersimasuni unamminartut kiisalu kissaatit pillugit qanimut oqaloqatigiissuteqarnissaq. Taama soqutiginarluinnartumik paaseqatigiinnikkut, aatsaat nuna tamakkerlugu ilorraap tungaanut kivitseqatigiinnissaq anguniarsinnaangatsigu.” Taama oqarpoq Thomas “Tyt” Mogensen, Nalik Venturesimi Pisortaaneq.

Saqqummiisoqareernerup kingunerani Qeqertalik Business Councilimiit Gerth P. Olsenimit isumasioqatigiinneq ingerlanneqarpoq, peqataasullu tunniusimallutik isumassarsiaminnik isummersuutiminnillu, namminneq nunaminni siunissamut ineriartoqqissinnaanermut tunngasunik immersueqataallutik.

“Nuannaajallannartorujuuvoq uku suliffeqarfiit pisortaaneri naleqqatigiilluta qanimut illoqarfipput pillugu tusarnaarlugillu oqaloqatigisinnaangatsigit. Aaqqissuussaq pissarsiaqarnaqaaq.” Taama oqarpoq Danny Mølgaard Disko Adventuresimiit Qeqertarsuarmi isumasioqatigiinnermi peqataasoq.

Aaqqissuussaq, immikkoortortaqarfiit suliffeqarfiillu akimorlugit, peqataasunut nutaanik attaveqaateqalersitsivoq kiisalu nukittunerusumik suleqatigiinnermik pilersitsilluni. Suliffeqarfiit aallarnisartunik kiisalu namminersortunik oqaloqateqartarnerat ingerlaavassaaq, tassami Qeqertalik Business Council kiisalu Grønlandsbanki Aasianni immikkoortortaqarfeqarput. Nalik Venturesimiillu angalaqataasut suli ullualunni najuunnerminni saaffigineqarsinnaajumaarlutik.