Septembarip aallartilaarnerani Qeqertalik Business Council & Destination Diskobay siulersuisuisa ukiumoortumik sammisassaqarlutik ataatsimiinnerat Aasianni Kangaatsiamilu ingerlappaat.
Naapisimaarnerminnut atatillugu iluatsillugu qaammatit pingasukkaartumik Aasianni inuutissarsiortut kiisalu Kommune Qeqertalimmi akisussaasut kaffisoqatigiittarneranni peqataapput, taamaasillutillu ataatsimeeqatigiit sammisartagaat oqaloqatigiissutaallu paasisaqarfingalugit.
Ullut ilaanni siulersuisut ulluinnarlugu Kangaatsiamut Aasianniit angallassisartoq angallassisoralugu tikeraarput. Angalanermittaaq peqataavoq Nalik Venturesimiit immikkoortortaqarfitsinni siunnersorti atorfinerlaaq Jens Christian Jacobsen, Naalakkersuisoq Naaja Nathanielsen tikeraarnissaanut atatillugu peqataasoq, Naalakkersuisulli tikinnissaralua ajoraluartumik kinguartinneqarluni.
Kangaatsiamut tikinnermi siulersuisut kommunep allaffiani sullissivimmi aqutsisumit tikilluaqquneqarput, malitsigisaanillu katersortarfimmi ilaatigut Qooqa Festivali ingerlanneqarsimanera pillugu sunniutaanillu saqqummiivigineqarlutik.
Illoqarfiup iluani siulersuisut takornariartinneqarneranni Sullissivimmi Aqutsisoq angallassisoralugu illoqarfimmi ulluinnarsiutaat unamminartuusinnaasullu qaqilertorneqarput, ilaatigut eqqaavissuaq tikinneqarluni. Pulaakkat pingaaruteqarluinnartut ilagaat meeqqat atuarfittaarsuat Iparartarfik, tassani atuarfiup pisortaa peqatingalugu ullu qeqqasioqatigiinneq ingerlanneqarpoq, apeqqutillu atuarfimmut kiisalu illoqarfiupput ineriartorneranut tunngasut qaqinneqarlutittaaq.
“Kangaatsiamut tikeraarnerput kommunemiillu kiisalu najukkami aqutsisunik naapitaqarnerput pissarsiaqarluarnarpoq. Illoqarfiup ulluinnarsiutaanut tunngasunik paasisaqarluarpugut, unamminartuuppata periarfissatsialaappataluunniit – tikeraarnittalu takuteqqiinnarpaa kommuneqarfiup illoqarfianni inuiaqatigiit qanimut suleqatigiuartarnissaat qanoq pingaaruteqartiginersoq”, taama oqarpoq Siulittaasoq Hanne Kristiansen.
Qeqertalik Business Council A/S siulersuisui tassaapput:
Hanne Kristiansen, Siulittaasoq
Julia Pars, Siulittaasup Tullia
Hans Jørgen Mørch, Ilaasortaq
Danny Mølgaard, GE Qeqertarsuaq
Søren Hansen, GE Aasiaat / Kangaatsiaq
Hans Aqqalu Lyberth Didriksen, GE Qasigiannguit