Takornarissanik angallassisartut pisisartullu niuffaffigigisartagaat ukiumoortumik ingerlanneqartartoq matumani 30. Septembari kiisalu 1. oktobari Akureyri Islandimi pivoq. Islandip avannaatungaani illoqarfik piorsarsimassutsikkut niuernermillu eqeersimaartoq. Tamannalu Destination Diskobay Pisortaaneranik Gerth P. Olsenimit peqataaffigineqarpoq, soorlu aamma nunatsinniit suliffeqarfiit takornarissanut assigiinngitsunik nunani tamalaani takornariaqartitsinermik pisisartunut neqerooruteqartartut 38-t allat peqataasuttaaq.

Niuffannissaarsuarmi inuit peqataasut katillugit 450-t missaaniipput, taakkunani nunani tamalaaniit pisisartut tuniniaasullu ataatsimut – taamaattumik naapeqatigiinnermi peqataasut eqeersimaarrallutik, naapeqateqarusussuseqarlutik isumaqatigiissusiorusussuseqarlutillu pipput. Ukioq manna nunatsinniit peqataasut ataatsimoorlutik nunatsinniit Akureyrimut toqqaannaq siumut utimullu timmisartoqatigiipputtaaq, tamannalu ataatsimuussuseqarnissamut suleqatigiissuseqarnissamullu tunngaviliilluarluni.

“Angalanermut aaqqissuisartut, immikkut toqqakkavut, nunani tamalaaneersut 18-it ataatsimeeqatigaavut, tamarmik immikkoortortaqarfitsinnut soqutiginnilluartut. Amerlasuullu nunarput ukkatarerusulersimavaat, misigisassallu nutaat immikkuullarissut, pisisartunut piukkunneqarlutik”. Taama oqarpoq Gerth P. Olsen.

Aaqqissuussami ataatsimeeqatigiipallaqatigiinnerit saniatigut nuannersumik sinaakkusersukkanik ilasseqatigiinneqarportaaq, tamannalu nunani tamalaaniit pisisartut nunatsinniillu tuniniaasut imminnut qaninnerulersillugillu attaveqatigiinnerit nukittorsarneqarput.

Vestnorden Travelmart 2025 taamaattumik nioqqutinik nutaanik saqqummiussiviuinnarnani aamma suleqatigiinnermut kiisalu nunatsinni takornariaqarnerup ineriartorluarnissaanut suleqatigiinnermut aallarnissaaqataavoq.