Ulluni makkunani oktobarip qaammataani nunatsinniit inuussutissarsiutillit, kommuneqarfinniit sinniisut, takoriaqartitsinermillu suliallit, PT Capital kiisalu Huna Totem Corporation suleqatigiillutik aaqqissuussineratigut Alaskami paasisassarsiortinneqarlutik angalaqatigiipput.
Angalanermi siunertaavoq nunatsinni inuussutissarsiornermik takornariaqarnermillu ineriartortitsinissamut isumassarsiornissaq misilittakkanillu aallerfiunissaa – uanilu umiarsuit takornariartaatit tulaffissiaannik, sammisassaqartitsiffiannik, nunaqavissullu peqatigingalugit suleqatiserinninnissaq ukkatarineqarput.
Angalaneq oktobarip ulluanni 13. – 17. ingerlanneqarpoq, sumiiffiillu arlallit tikeraarneqarput, ilaatigut Juneau, Hoonah, Anchorage, Whittier, Girdwood kiisalu Seward tikinneqarlutik. Angalaqatigiit tikitaminni borgmesterit, inuussutissarsiutillit kattuffiillu, ukiorpassuarni issittumi inuiaqatigiinni ineriartortitsillutillu piujuaannartitsiniarnermik suliaqarsimasut, naapeqatigaat.
Tikeraarnermi pilersaarummi ilaatigut Juneumi talittarfik majuartaallu alakkarneqarput kiisalu Hoonah Icy Strait Point takornarianut misigisassarsiorfik alakkarneqarluni – nagguaeqatitta nunaqavissut pigisaat – malitsigisaanillu Denali Commission aningaasaateqarfissua oqaloqatigineqarpoq aamma Alaska Tourism Industry Association paasisassarsiorfigineqarlutik.
Angalaqatigiit Alaska Federation of Natives Conference peqataaffigivaattaaq, nunatsinni takornariaqarnerup ineriartornera pillugu panelimi saqqummiisinneqarlutik. Saqqummiinermilu Hugh Short PT Capital pisortaa aqutsisuulluni, peqataapputtaaq Pitsi Høegh Greenland Sagalandsimiit, Klaus Dupont Iversen Hotel Auroramiit kiisalu Gerth P. Olsen Qeqertalik Business Councilimiit saqqummiisinneqarlutik.
Angalaqatigiinnermi tatituumik suleqatigiinnikkut nukittorsaarusunnermillu siunertalimmik, nunatsinni inuussutissarsiutitigut takornariaqarnikkullu piujujuaannartitsinissaq ineriartortikkumallugu, Alaskami nunap inoqqaavisa inuussutissarsiornermillu siuarsaanermik suliallit misilittagaat suleqatigiinnerilu aallaavigineqarlutik paasissassarsiorfigineqarput
