Kommune Qeqertalimmi Inuussutissarsiutitigut Siunnersuisoqarfimmiit nuannaarutingaarput Ilimanamiit Qasigiannguanut aqquserngiortoqarnissaanik takorluuinerup timitalernissaanut piviusunngortinniarneqartussanngormat.
Suliniutaasoq ukiorpaalunni eqqartorneqartareernikuusoq Qasigiannguani isumasioqatigiisitsisarnitsinni ataasiaannarnani, innuttaasunit, aallarnisaasunit, suliffeqarfiutilinnillu kissaatitut eqqartorneqartareerpoq, matumanilu kiisami pivisunngortinneqarnissaanut timitalerniarneqalerpoq.
Septembarimi Avannaata Kommuniani Kommune Qeqertalimmilu borgmesterivut naapeqatigiissimapput, kommuneqarfittalu akorngini sulieqatigiinnerup nukittorsarneqarnerunissaannut, aqquserngiornissaq ineriartortitassat qitiusut ilaattut taakkartorneqarsimalluni.
Avannaata Kommunia maannakkut suliniutip ingerlateqqinnissaanut akuersisimalerpoq, taamaallillunilu kommuneqarfitta aamma takorluugaq piviusunngortinnissaanut taperseeqataalluni.
Sooq aqquserngiornissaq pingaaruteqarpa?
Qasigiannguaniit Ilimanamut ujaraaqqanik aqquserngiornissap iluaqutissartai:
- Kommuneqarfitta akorngini inuussutissarsiutitigut ineriartortitsinissamut nukittorsaaqataassaaq
- Qeqertarsuup Tunuani takornariat siaruarterneqarnerunissaannut oqinnerulersitsissaaq – pingaartumik Ilulissani mittarfittaarsuup atulernissaa eqqarsaatingalugu.
- Najugaqarfiit suliffeqarfiit misigisassarsiortitsinerillu ikorfartussavai
- Ilulissani amerliartuinnartunik takornariaqaleraluttuinnarneranik oqilisaataaqataassaaq
- Innuttaasut inuussutissarsiutillillu pitsaanerusunik periarfissartinneqalissapput
Qeqertalik Business Councilimiit tamanna qilanaarutingalugu taperserparput
Kommune Qeqertalimmi Inuussutissarsiutitigut Siunnersuisoqarfimmiit suliniut tamanna tamakkiisumik tapersersorparput, periarfissanillu nutaanik, immikkoortortaqarfiup tamarmi iluaqutissaanik, amerlanerusunik pinngorartitseqataaffiunissaa qularinngilluinnarparput.
Takorluukkap uuma piviusunngortinnissaanut, kommuneqarfik sanilitsinniittup peqatiginera tulluusimaarutingaarput, tamannami ataatsimoornerup nukittorsaaqataanissaanut, ineriartortitseqataanissaanut, naggataatigullu Qeqertarsuup Tunuani innuttaasunut tamanut, tikeraanut, inuussutissarsiutilinnullu iluaqutaasussaammat.
Alloriaqqinnissap tullianut qilanaarutissaqarpugut – Tassami siunissamut immikkoortortaqarfitsinni immitsinnut qaninnerulertussaavugut.