Inuussutissarsiutitigut Siunnersuisoqarfimmi Qeqertalik Business Councilimi Pisortaq, Gerth P. Olsen oktobarip 14. – 16.-ani Harpami Reykjavikkimiittumi Arctic Circle 2021-mi ataatsimeersuartitsinermi peqataavoq.
Ataatsimeersuarneq sallertut Issittormioqarfik pineqarluni ingerlanneqartarpoq, tamannalu 2013-mi Nalaakkersuisut Siulittaasorisimasaata Kuupik Kleistip kiisalu Islandip Præsidenterisimasaanit Òlafur Grìmssonimit minnerunngitsumillu Alaskami nutaarsiassiisoqarfimmit Alice Rogoffimit aallarnerneqarsimavoq, issittormiut soqutigisaasa ukkatarineqarnerulernissaat anguniarlugu pilersinneqarsimalluni, ilaatigut politikkikkut, niuernikkut, takornariaqarnikkut ilisimatusarnikkullu sammisat nunarsuup sinneraniit peqataasoqarluni ataatsimiissutigineqartarlutik.
Silap kissakkiartornera ilutigalugu allanngoriartornerit, ilaatigut nunatta sermersuata aakkiartulerneranik kinguneqartoq pingaarutilittut qitiuvoq. Tamannalu Issittormiuqarfinni kattuffiit suliffeqarfiillu nunani allaniit soqutiginnittunut oqaloqatigiinnermik pilersitsiffiunissaattut, attaveqaatinik naapitsinissamik, kiisalu qanimut suleqatigiinnerulernissamik anguniagaqarfiuvoq. Assersuutigiinnarlugu Sullualuk aqqutingalugu angallaffiulernissaanut niueqatigiinnerulernissaq imaluunniit nunatsinni suliassanik ujartuisunut avataaniit aningaasaliisoqarsinnaaneranut periarfissanik aqqutissiuussinissamut suliniuteqarnissamut.
”Nunatta immikkoortortaqarfianniit ataatsimoorussamik niuernikkut sulialinniit saqqummiussinerusoqarnissaanik amingaateqarsorivara. Siunissami uuma ataatsimeersuarnerup immikkuullarissumik periarfissiilluarnerata inuussutissarsiuteqarnermik suliaqartunit atorluarneqarnerusinnaangaluarpoq. avataaniit suliffeqqarfiit kattuffiillu aningaasaliisinnaassusillit toqqaannaq attaveqaateqarfigilersinnaasat, nunatsinniit inuussutissarsiuteqarnermik sulialinnik qanimut suleqateqarnerusinnaanermik ujartuisinnaammata. Assersuutingalugu Sulisitsisut Kattuffianniit, Greenland Venture sinerissamilu Inuussutissarsiutitigut Siunnersuisoqarfiit allat pissanganartunik immikkoortortaqarfimminniit periarfissanik saqqummiussassaqarlutik aallartitaqarsinnaapput, tamakkulu aningaasaliisartuniit soqutigineqarluarsinnaassangaluarput”. Taama oqarpoq Gerth P. Olsen, Qeqertalik Business Council & Destination Diskobayimi pisortaq.
Inuussutissarsiutitigut Siunnersuisoqarfiup Vestnorden Travelmartimi Qeqertaliup takornariaqarnermut tunngatillugu nittarsaanneqarnera iluatsillugu, Arctic Circle Ataatsimeersuarnerani peqataavoq. Saniatigullu Islandip avannaani kangianilu inuussutissarsiuteqarnermik takornariaqarnermillu piorsaaniarlutik suliaqartut allat isumassarsiorfissatut ataatsimeeqatigisinnaasimallugit.
