Ulluni 17.- 19. oktober 2024 Inuussutissarsiutitigut Takornariaqartitsinikkullu ineriartortitsinissamik suliffeqarfipput Reykjavikimi Arctic Circle Assemblymut peqataavoq. Katersuunnersuarmi politikkikkut, ilisimatusarnikkut inuussutissarsiornikkullu Nuna Issittoq qitiutillugu assigiinngitsunik sammisaqartitsivoq.
Katersuunnermi ilaatigut aqutsisunut, aalajangersaasunut, ilisimatusartunut ilinniartunullu oqallinnerni apeqqutilliinissamik ilikkagaqarnissamillu periarfissiivoq, matumanilu ataatsimoortitsinerup pingaaruteqassusaanik naleqassusaanillu ersersitsilluni.
Ukioq mannalu aaqqissuisut siullermeertumik Arctic Circle Business Assemblymik taallugu saniatigut aaqqissuussaqarput, matumani inuussutissarsiuteqarnermut sammisat ataatsimoortillugit nuna tamalaaniit inuussutissarsiutillit peqataaffigisaannit ingerlanneqartumik. Sammisat soorlu Nuna Issittumi Amerika Avannarlermilu niueqatigiinneq suleqatigiinnerlu eqqartorneqarpoq, nukissiuutit piujuaannartut, erngup nukinganik nukissiuuteqarfiit, kiisalu Nuna Issittoq akimorlugu aningaasaliisartunut tunngasutilinnik ilaatigut sammisassaqartinneqarluta.
“Sammisassarineqartut assorsuaq soqutiginaateqarput, pingaartumik aalajangersaasut akornanni toqqaannaq suleqatigiissuteqatigiiffiusinnaasut eqqartuleraangatikkit, assersuutingalugu usinik assartuinermi Amerika Avannarliup Nunatsinnilu usinik assartuinermut tunngatillugu periarfissarsioqatigiinnerat, Europamiit Nunatsinnut assartuinissaq pinngikkaluarlugu” taama oqarpoq Gerth P. Olsen.
Ukioq manna pisortaq Gerth P. Olsen peqataanermini Visit Greenland, Innovation South Greenland aamma Arctic Circle Destination peqatigalugit saqqummeeqatigiipput, nunatsinni nuna tamakkerlugu immikkoortortaqarfinnilu takornariaqarnerup siaruarneqarnissaanut tunngatillugu saqqummiillutillu oqallisissioqatigiipput.
“Tikeraartutsinnut matu qiverlugu ammatiinnanngilarput, piumasaqaateqarlutalu killilersuivugut aamma. Innuttaasunut tikeraartunullu naatsorsueqatigiinnissaq eqqarsaatingalugu aamma maleruagassanik sinaakkusissiortarpugut, aap takornarissat amerlanerusut tikerartikkusuppavut, tamannali innuttaasut toqqissisimanerannut eqqissisimanerannullu innarliinnginnissaa pingaarnerpaavoq” Olsen taama ilaatigut oqarpoq.
Aammattaaq Destination Manageri The Arctic Policy Hackathonimut peqataavoq Nuna Issittumi siunissami aalajangiisartussat ilaattut, tamannalu ilaatigut Arctic Mayors’ Forumimit aaqqissuunneqarluni ingerlavoq.
“Ullut marluk affarlu ingerlanerani inuusuttut Issittormiut allat peqatigalugit takornariaqarmerup iluani nammineq sumiiffitsinni nukittuffigut, naleqartitagut unammillernartullu eqqartorpagut. Ilaatigut nunap inoqqaavisa nunasiaataasimanerannut sunniutaasimasut sakkortuut sulilu massakkumut sunniutaasut. Avatangiisivut, nunaqavissut illersornissaannut suut anguniarneqassanersut minnerunngitsumillu atortulersuutit, nunap ataqatigiinneranut attaveqarfiinut tunngasut qanoq pitsanngorsarneqarsinnaanersut siunnersuusiorluta” Navarana Bidstrup Takornariaqarnermi Aqutsisoq taama oqarpoq.
