Takornariaqarnerup tikiunnissaanut piareersarneq
Ilulissat mittarfissuartaarnissaanut atatillugu naattorsuutigineqarpoq Diskobugtimi illoqarfinni takornarissat takussaanerulernissaat. Tassunga atatillugu 2021-mili piareersaaneq ingerlannikuuarput, pisuttuarfissat aqqutillu nalunaaqutsersorneri, illoqarfiup iluani skiltinik ornitassanut pingaarnernut tikkuussissutinik nappartiterinerit, soorlu Peqqissaavinnut, mittarfiit tungaanut, akunnittarfiit, katersungaasiviillu tungaanut tikkuussisunik.
Tassungalu atatillugu siullertut toqqarnikuuarput Aasiaat illoqarfia tikkuussissutinik pilersornissaa, sumut ingerlanissamut tikkuussissutit, avataanilu pisuttuarfiit nalunaaqutsersorneri. Qasigiannguit illoqarfia tikkuussissutinik pilersoreersimalerpoq, illoqarfiillu sinneruttut tulleriiaarlugit pilersornissaat sulissutigileruttorlutigut. Tullinnguupporlu Qeqertarsuup pilersornissaanut atatillugu, Qeqertarsuarmi kommune allaffiani susassaqartut oqaloqatigineri aallartinneqareersimalerlutik piareersarneqaleruttorput.
Illoqarfiup iluani aqqusinermi tikkuussissutit, sumiissutsinut ingerlaarnermilu nalunaarsuutit ukiuunerujussua taavalu tikkuussissutit napasortassaasa tammarsimaneri peqqutaallutik suliarineri sivittuutileraluartullu kiisami kingulliit nassaassarsiullaqqinnikkut iluatsittumik Aasiaat illoqarfiata iluani piffinni assigiinngittuni Qeqertalik kommune, sanasullu suleqatigalugit ikkunneqarput.
“Neriuppunga innuttaasut tikeraallu sumiiffinnut aqqutinullu tikkuussissutit paarilluarneqarlutillu atorluarumaaraat..” Taama oqarpoq Gerth P. Olsen, adm. direktør Qeqertalik Business Council A/S.
Tikkuussissutit nappartiterneqarsimasut tamarmik Qallunaatut tuluttullu allanneqarput tikeraat takornarissat illoqarfitsinnillu ilisarisimanninngittut ajunngittumik aqqutissiuunnissaat pinerullungu, uagut nunaqavissut nalunngereeratsigu illoqarfitsinni ataasiakkaani sumiiffiit pissutsillu.
Maanna tullinnguutissaaq QR kode atorlugit illoqarfiit ataasiakkaani piffinni aaliangersimasuni aqqusernit aqqi, sumiiffiit oqaluttuarisaanitsinnut pingaaruteqartut oqaluttuassartaasa allakkiaralugit atuangassiarinissaat, siunissaq sivisunerusoq eqqarsaatigalungu qaqugumulluunniit eqqaamaneqartuartussanngorlugit.