Ukioq manna umiarsuit takornariaartaatit ukkatarineqarluarneri Kalaallit Nunaata nunarsuup ammaqqinnerata kingorna malugilluarpaa. AECO aamma Destination Diskobay, Qeqertarsuup tunuani innuttaasut takornarialerisullu qanimut suleqatigalugit, umiarsuarlutik takornariartunut najoqqutassanik nutaanik saqqummersitsipput. Aatsaavissuarlu AECO-mi nunatsinni oqaatsivut atorlugit najoqqutassat kalaallisut pisortatigoortumik saqqummersinneqarlutik. 

 Oktobari 2022-mi AECO-p nunanut avannarlernut umiarsuit takornariartaatit peqatigiiffiat ukiumoortumik takornarialerisut ataatsimiisippai. Ukioq manna ataatsimiisitsinermi Kalaallit Nunaat eqqartorneqangaatsiarpoq, Qeqertaliup illoqarfiinit pingasuusunit najoqqutassiat ilanngunneqartut akuerisassanngorlutik inissinneqarnikuummata. 

 Paasissutissat najoqqutarisassallu imarisaat Destination Diskobayimit innutaasunit takornarialerinermilu suliaqartut Aasianni, Qasigiannguani, Qeqertarsuarmiullu peqatigalugit paasissuatissat katersorneqarnikuullutik. 

Najoqqutassiorluni pilersaarusiaq NORA-miit tapiiffigeqarnikuuvoq – uani paasisaqarnerugit. 

 Siullermeertumik sumiorpaluutit atorlugit saqqummersitsisoqarpoq 

 – Destination Diskobayimiit tanngassimaarutigaarput najoqutassat tamarmik akuerisaasimammata atuutsinneqalerlutillu” taamak oqarpoq takornariaqarnermi aqutsisoq, Linda Kleist nangillunilu: 

“Ilisimasassarsiorlutik angalasunut maannamiit Qeqertaliup illoqarfiinut aqqusaartinnatik, najoqutassanik akuerisanik agguaassuuffigineqartalissapput. Taamaasillunilu takornariat illoqarfimmut tikitassami innuttaasuinut ileqqulersuutaannullu ilisimasaqalaareernissaat qulakkeerneqartalissammat. 

Tamannalu takornariat piujuaannarnerusumik pissusilersuuteqartarnissaannik aamma sunniuteqarluaqataasinnaalluni.” 

Qeqertarsuup tunuani najoqqutassat aamma pisortatigoortumik Kalaallisut saqqummersinneqarput. Tamanna nutaajuvoq, naliginnaasumik pisortatigoortumik najoqqutassat AECO-meersut tuluttuinnaq saqqummersinneqartaraluarput. Nutserneqarnerinut peqqutaavoq innuttaasut, umiarsuarlutillu takornariartut imminnut paaseqatigiilluarnissaat, taamaasillutillu aamma nuannernerusumik naapeqatigiissinnaanissaat anguneqassalluni. 

Takornariartaatilerisut attaveqaatitaartorput 

Oktobarimi AECO-p ataatsimiisitsineranit peqataasut akornanni Qeqertalimmi takornariartaatilerisut Destination Diskobayikkullu avammut attaveqaatitaartorput. 

“Umiarsuarnik takornariartaatilerisut silarsuaannit siammasinnerusumik paasinnittaaseqalernerulerpugut, tamannalu siunissamut suleqatigiinnissatsinnut pingaaruteqarluarumaarluni”. Taama oqarpoq Linda Kleist nangillunilu: 

“Nuannaarutigaara umiarsuarnik takornariartaatileeqqat, nunatsinni nunaqavissut, avatangiisit, aningaasaqarneq inuiaqatigiinnullu tunngassutillit, annertunerusumik eqqumaffigilermatikkit. Taamaammat  takornariaqarnermi suliaqartuusugut sumiiffitsinnut umiarsuarmik takornariartaatileeqqat amerlisinnissaannut sulissuteqarusuppugut. 

Qeqertaliullu illoqarfiini umiarsuarnik takornariartitsisartut AECO-lu oqaloqatigiittarnerput ataavartumik ingerlatissavarput, umiarsuarnik takornariat innuttaasullu nuannersumik misigisaqartitarnissaat qulakkeerniarlugu.  

Uani AECO-p najoqqutassiaat Aasiannut, Qasigiannguanut aamma Qeqertarsuarmut atuakkit.