Destination Diskobay pisortaa Gerth P. Olsen, ataatsimeersuartitsinermi ‘An Ocean of Opportunities’ taaneqartumi Tórshavnimi Savalimmiuni peqataavoq. Ataatsimeersuartitsinerup sammivigaa NORA-p nunaasa immikkoortortaqarfianni Atlantikup avannarpasissuani, piujuartitsisumik takornariaqartitsineq kiisalu sineriallit qeqertallillu akorngini ineriartortitsineq. Ullut marluk ingerlaneranni peqataasut Atlantikup Avannaaneersuunerusut misilittakkaminnik saqqummiussillutillu avitseqatigiipput, minnerunngitsumillu attaveqaqatigiilernissamut periarfissiillutik.

Destination Diskobayip immikkut sammisassatut soqutiginartitaa tassaavoq qeqqussat – Kommune Qeqertalimmi inuussutissarsiutitut piujuartitsissumik ilippanaateqarluartutut ineriartortinneqarsinnaasutut piukkunnartippaa. Tassungalu tunngatillugu Karolina Martinson (Algblomman AB, Sverige) saqqummiivoq inuussutissarsiornermi qeqqussat qanoq atorneqarsinnaanersut, nerisassiornermiuppat, avatangiisivut pillugit oqaluttuartarnermiuppat, taamaalillunilu immap avatangiisiisa paasineqarluarnerulernissaannut immersueqataalluarlutik.

Siusinnerusukkut immikkoortortaqarfitsinni nunaqarfiit ilaanni qeqqussanik atorluaaneq sammisaqarnerlu ingerlanneqartareersimavoq, matumanilu periarfissanik atorluaanikkut qeqqussanik suliniuteqartoqaqqilernissaa kissaatigaarput. Qeqqussat inuussutissarsiornermi, misigisassarsiornermi kiisalu avatangiisinut ataqqinnittumik nunaqavissut aallaavingalugit ineriartortinneqarsinnaanerannik periarfissiipput.

Taamatuttaaq Benjamin Donner (Archipelago National Park, Finland) finskit qeqettaasa akorngini takoriaqartitsinermik imminut napatittumik, qanoq ingerlatsisoqarsinnaaneranik, najukkani innuttaasut avataagissillu akimorlugit nammaqatigiisinniarsaralugit ineriartortinneqarsinnaaneranik saqqummiivoq. Taassumalu misilittagai Qeqertarsuup Tunuani aallarnisaasinnaanermut atorluagassaqqittunik assersuuteqarluarpoq, piffimmi najungaqartut piginneqataanissaat, piviusorsiorneq, avatagiisinik paasinnilluarsinnaanerlu misigisassarsiortitsinermi aallavigineqartussanik pilersitseqataasimavoq.

Takornariaqartitsinermik inerisaasutut soqutigisarilluinnarparput, Aasiaat eqqaanilu qeqertarpaat akorngini, qaannamik misigisassarsiortitsisinnaanissamut qitiusoqarfiunissaa – Qeqertarpassuaqarfiunera, sineriaqarfiulluarnera kiisalu immap eqqissisimalluarsinnaanerisa atorluarsinnaanera eqqarsaatingalugu, Qeqertalimmi qaannamik misigisassarsiorusuttunut, misilittagartuuppata aallarterlaajuppataluunniit, takornariaqarfittut ineriartortinneqarluassinnaanera qularutiginngilarput.

Ataatsimeersuarnerup ersersiinnarpaa, imarpissuarput ilippanaatinik ulikkaartoq – Qeqertarsuup Tunuani imminut napatittumik periarfissaqarluartoq atorluarneqarsinnaasunik kiisalu oqaluttuanik nutaanik pilersitsiffiulluarsinnaaneranik.

Destination Diskobay Savalimmiuni ataatsimeersuarnermi pissarsiarineqartut ineriartortitseqqinnissamut atorluarusuppagut, qeqquaappata  imaluunniit imminut napatittumik suliniutaappata, piffinnilu nunaqavissunut suliffissanik pilersitsiffiusinnaappata, paasissutissiinerit avatagiisitsinnillu atorluaanikkut takornariaqarnermik ineriartortitsiffiuppat peqataaffingerusukkatsigit.

Ataatsimeersuarnermik sammisat saqqummiussallu annertunerusumik paasisaqarfigineqarusuppata, NORAp nittartaagaasigut paasissutissanik annerusumik maana alaatsinaattoqarsinnaavoq.