Immikkoortortaqarfitsinni inuussutissarsiuteqartunut atungassarititaasut pitsanngorsaavigerusullugit, kiisalu nunarput akimorlugu attaveqaatit ataavartinniarlugit nutaallu pinngortinniarlugit, Qeqertalik Business Council sapaatip akunnerani qaangiuttumi Nuummi inuussutissarsiuteqartunut tunngassuteqartuni assigiinngitsunik ataatsimeeqattaartoqarnerani peqataavoq.
Inuussutissarsiornerup takornariaqarnerullu ineriartortinneqarnissaa immikkoortortaqarfitsinni Qeqertarsuup Tunuani kanaartaqartup Qeqertalik Business Councilimit Destination Diskobayimillu ataqatigiissarneqarpoq. Taamaakkaluartorli piujuaannartitsinissaq toqqammavingalugu ineriartortitsinissaq immikkoortortaqarfiit suliassaqarfiillu akimorlugit ineriartortitseqataaffiusariaqarpoq. Ataatsimiinnermilu peqataasut tassaasimapput nuna tamakkerlugu kommuneqarfinniit inuussutissarsiutitigut takornariaqartitsinermillu suliaqartut tassanilu Innovation Greenland aamma Greenland Holding qaaqqusisuullutik.
Ataatsimiinnermi sammisaq tassaasimavoq Nammisornersorlutik Oqartussat Innovation Greenlandillu kiffartuussinissamut isumaqatigiissutaasa allanngornerata kingorna siunissami suleqatigiinnerup nutaap isikkussaa. Allannguutaasimasummi ilagisimavaat misiliutitut inuussutissarsiutitigut ineriartortitsinissamut aningaasat Qeqqata Kommunianut Arctic Circle Businessimit nammineq aqunneqartussanngorlugit inissinneqarnikuunerat.
Nuna akimorlugu ataqatigiissaarinerunissaq
Nuummi ataatsimeeqatigiinnermi eqqartukkat arlaqarput. Ilaatigut siunersuisoqarfiinniit eqqartorneqarpoq nuna tamakkerlugu ataatsimoorussilluni inuussutissarsiutitigut ineriartortitsineq qanoq ikorfartorniarneqassanersoq, kiisalu qanoq inuussutissarsiutitigut kattuffiit qanoq aalaakkaasumik sinaakkusersorneqassanersut.
“Immikkoortortaqarfigut akimorlugit suleqatigiilluareerlutalu ataavartumik oqaloqatigiilluartareerpugut. Tamaammallu Innovation Greenland aqqutingalugu tapiissutaasartut kiisalu pikkorissaasarnerit ataqatigiissarluarneqarnerunissaat nukittorsaaffigineqarnerunissaalu naapertuuppoq. Qilanaarpugullu siunissamut suli sinerissami suleqativut kiisalu Innovation Greenland peqatingalugu suleqatigiilluarnissatta ingerlannissaanut” taama oqarpoq Qeqertalik Business Councilip pisortaanera Gerth P. Olsen.
Future Greenlandimi isumasiueqataaneq
Inuussutissarsiutitigut takornariaqartitsinermilu siunnersuisoqarfiit ataatsimeereernerata aqaguani Qeqertalik Business Council isumasioqatigiinnermi Future Greenlandimi peqataavortaaq. Tassanilu pisumi nunarsuatsinni nunatsinnilu inatsisartunit nuimasuunit peqataaffigineqarpoq, nunarput kiisalu nunarsuaq politikkikkut sumut ingerlaarnersoq inuiaqatigiinnut soqutiginnittunik, inuussutissarsiutilinnit, inatsisartunit, kommuninit, ilinniartunit allarpassuarnillu isumasiueqataaffigineqarluni. Ilaatigut sammisaq nunanit tamalaaniit isummersuiqataaffigineqarluni ingerlanneqarpoq, Canadamiit, USA-miit Skandinaviamiillu peqataaffigineqarnermigut.
Sammisaq nunarput akimorlugu inuussutissarsiutitigut takornariaqarnikkullu ineriartorneq sammineqarpoq. Saqqummiinerit isumasiuinerillu avataatigut Qeqertalimmi immikkoortortaqarfitta peqataasut nunarsuarmi tamaneersut allat ammasumik oqaloqatigineranni aamma sammineqarportaaq.
Borgmesteri peqatingalugu suliffeqarfinnut pulaarnerit
Sapaatip akunnerata ingerlanerani Borgmester Ane Hansen peqatingalugu nunatsinni suliffeqarfissuit ataatsimeeqatigineqarputtaaq. Tassani Borgmesteri Qeqertalik Business Councililu Royal Greenlandimi kiisalu Polar Seafoodimi aqutsisut Nuummi allattoqarfissuanni ataatsimeeqatigineqarput, Qeqertalimmi illoqarfinni nunaqarfinnilu suliffeqarfiutaat ineriartornissamullu sammisat eqqartorneqarlutik.
Qeqertalik Business Councilip sammisarpassuit pissarsiallu amerlasuut immikkoortortaqarfitsinni Qeqertarsuup Tunuani ineriartortitsinissamut iluaqutissatut toqqorlugit angerlaappai.
