Ukioq manna aammaarluta Inuussutissarsiutitigut Siunnersuisoqarfimmiit kommuneqarfiup iluani inuussutissarsiutillit takornariaqartitsisullu isumasiornerisigut siunnersuutinik kissaatinillu katersisimavoq. Taakkulu Qeqertalimmi kommunalbestyrelsemut kommunip 2024-mut missingersuusiassaanut siunnersuutitut innersuussutigineqarlutik tunniunneqareerput.
Upernassaq Kommune Qeqertalimmi inuussutissarsiutillit takornarialerisullu 40-t missaanniittut illoqarfimminni pitsannguutissanut siunnersuutinik Qeqertalik Business Councilimut tunniussaqarsimapput. Tamannalu isumasiuisitsinerni Aasianni, Kangaatsiami, Qeqertarsuarmi kiisalu Qasigiannguani ingerlanneqartuni, Inuussutissarsiutitigut Siunnersuisoqarfiup qaaqqusissuteqarsimanerisigut pisimalluni.
Tassanilu kommuneqarfiup illoqarfianni pitsaanerusumik najungaqalernissamut, suliffeqarfimmik ingerlatsinissamut kiisalu takornariarfissaqqissuunissaanik aallussinissamut siunnersuutaallutik. Siunnersuutit tamarmik, Kommune Qeqertaliup politikkikkut naleqqiussaanut tulluarsangaallutik.
Kommunalbestyrelsimi missingersuusiornerat
Qeqertalik Business Councilip isumasiuereernerup kinguninnguani innuttaasuniit siunnersuutit katitersimavaat. Maajip naalernerani Inussutissarsiutitigut Siunnersuisoqarfiup 2024-mut missingersuutissanut Qeqertalimmi kommunalbestyrelsemut innersuussutissatut tunniunneqarsimallutik.
Inuussutissarsiuteqartuniit siunnersuusiarineqarsimasut tassaanerusimapput nunap sanaartukkatigut aaqqissuunneqarneranut kiisalu sukisaarsaatissanut tunngassuteqartut. Siunnersuutaasut ilaat siumungaaq isingaluni inaarsaatissatut suliassaapput, ilaalu aningaasaliissuteqalaarnikkut imaaliallaannaq pilersinneqarsinnaallutik. Siunnersuutaasullu amerlanerusut immikkoortortaqarfitsinnut nukittuallaatissatut 2024-2025-mi Ilulissani mittarfittaarsuaqalernissamut kiisalu takornariaqalernerunissamut piareersaataasussaallutik.
Inuussutissarsiuteqartuniit siunnersuutit ersarittut
Siunnersuutini nutaani ilaatigut Hotel SØMAmiit akunnittarfiup allilertornerneranut attuumassuteqartunik siunnersuutit pingasuusut ilanngunneqarput, taakkulu illoqarfimmut innuttaasunullu iluaqutaasussaassapput. Tassami akunnittarfiup pilersaarutaasa ilagimmassuk saaminni nutaamik sissiugaqalernissartik, tamannalu soqutiginarluartunik malitseqartikkusuppaat, ilaatigut umiatsianut puttasumik ilaneqarnissaa kissaatigimmassuk, taamaasillunilu illoqarfimmi puttasut pioreersut ulikkaaqqalluinnareersut oqilisaanneqarsinnaalissalutik. Taassumalu saniatigut sissiukkap nakkaatinnginnissaa anguniarlugu patajaallisarneqarnissaa kissaataalluni, ilaatigut ukiuunerani aputaajaassuit apummik immamut eqqaavigisinnaasunngornissaa eqqarsaatingalugu aammalu biilinut uninngaviusinnaasutut atugassaqqissinnaalluni.
”Nuannaarutingaara inuussutissarsiuteqartut kommunip missingersuusiaannut uagut aqqutingaluta ersarissunik siunnersuuteqarsinnaammata. Taamaakkaluartorli neriuutingaara, kommunimi innuttaasut inuussutissarsiuteqartullu siunnersuutaat soqutiginarluinnartut, politikeritsinnit eqqarsaatigineqarluarumaartut”. Taama oqarpoq Gerth P. Olsen Qeqertalik Business Councilimi pisortaaneq.
Siornarnisanit uteqqiinerit
Siorna kommunalbestyrelsimut siunnersuutitut tunniunneqartut akornanni ataasinnguamilluunniit aalajangersaaviusimanngimmata, ukioq manna amerlasuut innersuussutitut ilanngunneqarlutik nassiunneqaqqipput.
Ilaatigut siunnersuutaasimasut ilagaat pisulluni aqqutissanik tummeqqianillu ilaartuinissaq, sukisaarsaatissaqartitsinerit, illoqarfinni anartarfinnik pilersitsinerit allarpassuillu. Tamarmik illoqarfitsinni pitsanngorsaataaqataasussat innuttaasunullu periarfissiisussat.
”Inuussutissarsiutitigut Siunnersuisoqarfimmiit nuannaarutingaarput, inuussutissarsiuteqartut isumasiuisitsinitsinni soqutiginnilluarlutik peqataasinnaasimammata, tulluusimaarutingalutigullu kommunalbestyrelsemut innersuussat ingerlateqqissinnaasimagatsigit. Maannakkullu pissanngatigissavarput kommunip aappaagumut missingersuusiaanni innersuussutigineqartut sorliit ilanngunneqarumaarnersut”, taama oqarpoq Gerth P. Olsen.
Kommunalbestyrelsemut innersuussutaasimasut tamarmik takuneqarsinnaapput uani.