Qeqertalik Business Council aaqqissuussaannik Kommune Qeqertalimmiit kiisalu Avannaata Kommuunianit suliffeqarfinnik ingerlatsisut takornarissanillu sullissiut isumasioqatigiisinneqarmata, siniffissaqartitsinermiit suleqatigiinnerulernissamut annertuumik oqallittoqarpoq.

Isumasioqatigiinneq qulequtserneqarsimavoq ´minnerusumik nunap ataqatigiinneranut attaveqarfiit´ , oqaluuserineqartut ilaatigut ilagivaat nunap immikkoortuanik agguaassinerit kiisalu assartuinermut periarfissat, innuttaasut piumassusaat politikkikkullu soqutiginninnerit.

Isorliunerusut aamma Qeqertalik ukkataralugit

Isumasioqatigiinnermi ukkatarineqarpoq Avannaata Kommuuniani isorliunerusut kiisalu Kommune Qeqertalimmi takornarissanik sullissisut qanoq isillutik suleqatigiinnerulersinnaanerat, kiisalu Ilulissani mittarfissuaq inaarneqarpat takornarissanik tikittunik qanoq agguaqatigiissaarisoqarsinnaanera. Isumasioqatigiinneq Aasianni ingerlanneqarpoq apriilip tallimaaniit arfernat ilanngullugu ukioq 2022, tamannalu Ilulissani oktoberimi 2021-mi aaqqissuussamut assigusumit malitsigitinneqarpoq. “Isumasioqatigiinnermi peqataasut takutitsilluarnerat nuannaarutigaarput. Tamatumani ersersinneqarpoq innuttaasut Qeqertalimmi takornariaqarnikkut ullumikkornit annerusumik inerisaaqataarusunnerat.” Taama oqarpoq Qeqertalik Business Council’imi pisortaq Gerth P Olsen.

Politikkikkut anguniakkat ersarinnerusut ujartorneqarput

Isumasioqatigiinneq aallartilluarpoq, assigiinngitsunik isumassarsiorfiulluarsinnaasunik saqqummiisoqarneraniit, kingornalu peqataasut eqeersimaartumik eqimattakkaarlutik suliaqarnermik ingerlatsillutik, tamannalu attaveqaqatigiinnermik pitsaasumik pilersitsinissamut isumalluarnartoqarpoq. Eqimattat saqqummiinerannik oqallinnermillu aaqqissuussaq naammassineqarpoq.

Eqimattakkaarnerup kingorna saqqummiinerit kiisalu oqallinnerup inerniliuppaa politikkikkut pitsaanermik kiisalu ersarinnerusunik sinaakkusiisoqarnissaa, ineriartorneq qanoq ingerlanneqarnissaa eqqarsaatigalugu. Takornariaqarneq eqqarsaatigalugu aallarnisaasut, ilisimasat kiisalu pingaarnersiuinissamut sakkussat annerusut pisariaqartippaat.

Peqataasunit ujartorneqartut ilaatigut tassaapput patajaannerusumik kommuunip pilersaarutai kiisalu siunissaq ungasinnerusoq eqqarsaatigalugu anguniagassat piviusorsiortut suliarissallugit kajuminnarnerusut.

Qeqertalik Business Council isumasioqatigiinnermi qaqinneqartut ingerlateqqillugit sulissutigerusuppaat. Pingaarnertut sulinermik inuussutissarsiornermik siunnersuisooqatigiit isumasioqatigiinnermi eqqaartorneqartut inuussutissarsiornermut pilersaarusiamut 2023-mut atussallugit isumaliutersuutigaat, taamatuttaaq isumasioqatigiinnermi qaqinneqartut politikkikkut nunap ataqatigiinneranut attaveqaatinik suliaqartunut suliassaq ingerlateqqinnissaa kommuunimi oqartussaaffinnut kiisalu nuna tamakkerlugu oqartussaaffinnut ingerlateqqereersimavaat.

Qeqertalik Business Council’ip pisortaa Gerth P. Olsen ima naggasiivoq: “Isumasoqatigiinnerup kiisalu takornarissanik sullissisut oqariartuutaata naqissuserpaat innuttaasut namminneq naapissinnaanissaat kiisalu suleqatigiiffiusunik pilersitsisinnaanissaat pisariaqartoq, soorlu matumani isumasioqatigiinnermi taama pisoqartoq. Tamannalu aaqqissuussisutut tulluusimaarutigaarput. Maannakkullu piumassuseq uummaarinnera atorluarlugu oqartussanut sinaakkuttanik ersarittunik inissiisoqarnissaa oqariartuutigissallugu tullinnguuppoq, nunaqavissut piumassuseqarluarnerat ingerlatiinnarumallugu.”