Nunarsuaq ammariartoqqilerpoq, tamannalu isumaqarpoq qeqertarsuup tunuanut umiarsuakkut takornarissat tikeqqittalilersut. AECO suleqatigalugu Destination Diskobay takornarissanut najoqqutarisassaanik nutaanik saqqummersitsivoq, piujuaannarnerusumik takornarissat angallattalernissaat anguniarlugu.
Umiarsuakkut takornarissatut qanoq pissusilersussuunga, qeqertarsuup tunuani illoqarfiit tikinniarukkit? Qimmit pattalaarsinnaavakka? Suut aamma ilisimasariaqarpakka illoqarfiit tikinniarukkit?
Apeqqutit taakku takornarissat arlallit apeqqutigisarpaat Kalaallit Nunaanni umiarsuakkut takornarissatut angalatillutik. Massakkullu taakku apeqqutit akissutissaqalerput, ilitsersuutissaqalerlunilu.
AECO – nunanut avannarlernut umiarsuakkut takornarialerisut peqatigiifiat aaqqissuuseqataasuupput qeqertarsuup tunuani ”inuiaqatigiillu ataqqeqatigiinnissamut najoqqutarisassat” illoqarfinni pingasuni sananeqarnerini. Paasissutissat najoqqutarisassallu imarisai katersorneqarnikuupput Destination Diskobay aammalu innuttaasut, takornarialerinermillu suliaqartut peqatigalugit Aasianni, Qasigiannguani aammalu Qeqertarsuarmi. Iluarsartuullugu pilersaarusiaq NORAmiit tapiiffigeqarnikuuvoq.
Qeqertarsuup tunuani tikeraajulluarniaraanni najoqqutassat
Najoqqutassat nutaat umiarsuakkut takornarissanut tunniunneqartassapput qeqertarsuup tunuani illoqarfiit tikitsillugit. Najoqqutassani paasissutissat assigiinngitsut nassaassaajumaarput, soorlu imertartarfiit sumiifii, innutaasut ussersortariaasaai qanoq isumaqarnersut, suut takornariagassaqqinnersut aammalu siunnersuutit qanoq takornarissat nunamiittassanersut.
Takornarissat aamma inatsipput innutaasut pisiniarfiini tapersersueqqullugit, taamaasillutillu aamma piareersarneqarluarlutik pitsaasumik illoqarfiit tikitatik takornariarnissaannik.
”Najoqqutassat nutaat sananeqartut, qeqertarsuup tunuani takornariaqarnermik piujuaanarnerusumik ineriartortitsigusunnitsinnut ikorfartueqataapput” taamak oqarpoq Linda Kleist, takornariaqarnermik aqutsisoq Destination Diskobayimi. Nangillunilu ”Uagutsinnut pingaaruteqarnikuuvoq, najoqqutassanik suliaqaqatigiinitsinnut isummat eqqartorneqartullu piffinni assigiinngitsuni innuttaasuninngaannernissai. Namminermi innutaasut kisimi nalunngilaat suut pingaaruteqarnersut aammalu suut eqqumaffissaanersut inuiaqatigiinni taakkunani. ”