Qeqertalik Business Councilimut sapaatip akunnera pisoqarfiulluarsimasoq naasimalerpoq. Ulluinnarni suliatta saniatigut, suliniutit pissanganartut ilaatigut aallarnisartunik siunnersuinerit qulequttallu assigiinngitsut matumani saqqummiukkusuppagut:
Naammassisaqarluarsinnaasumik suleqatitaarneq
Ukiup nikinnerani suliniutinut aqutsisussamik suleqatitaarnikuuvugut, suliffeqarfiup ukiumut pilersaarutaa malillugu iliuusissatut pilersaarutitsinnik aqutsinermik suliaqartussamik. Suleqatitaattalu sullarilluni suliassat aallartisarnissaat ingerlappai, tamanna aallarnisarluni ataatsimiinnerni arlalialunni malugisimavarput. Taamaattumik nunatta immikkoortuani naammassisaqarfiulluartumik ineriartornissatta nangeqqinnissaanut qilanaarpugut.
Siunnersorteqarnermik aaqqissuussineq
Taakku saniatigut aalajangersimasumik ingerlattagarput kommunitsinni inuussutissarsiutinik ingerlatsisunut soqutiginnittunut, siunnersorteqarnermik aaqqissuussinermi peqataarusussimasunut, siunnersortinik ataatsimiisitsineq ingerlapparput. Aaqqissuussaq Resonans, amerikkarmiut naalakkersuisuisa ingerlassaannut USAID-imut ilaasoq, Kalaallillu Nunaata USA-llu akunneranni sunniuteqarluartumik ineriartorfiusumillu ataqatigiinnissamik pilersitsisussaq, suleqatigalugu ingerlapparput. Immikkut suliniummut tassunga INUVA-p Resonans sulisussarsiarisimavaa, uagullu peqatigaluta siunnersorteqarnermik aaqqissuussaq aallarnisarsimavaat, nunatta immikkoortua Kalaallit Nunatsinni siullersaalluni taamatut aaqqissuiffiulluni.
Nunani allani pilerisaarineq
Destination Manageritta nunatta immikkoortuani takornariaqarnerup siuarsarnissaa sulissutigaa, nunanullu allanut pilerisaarinissap piareersarneranut atatillugu sineriammi suleqatiminik akuttunngitsumik ataatsimeeqateqartarpoq. Maajimi Adventure ELEVATE-mut Østrigimi pisussamut peqataanissarput pilersaarusiuleruttorparput, tassanilu suleqatitta angalanissanik aaqqissuussisartut tusagassiortullu misigisassarsiorluni angalanissanik pilerisaarisartut tuniniaasartullu naapissavai, matumani aamma nunatsinniit nunarsuup sinneranut angalanerit pineqarlutik.
Pingasoqiusatut ataatsimiinneq
Sapaatip akunnerani matumani aamma kommunip aqutsisuisa, illoqarfimmi inuussutissarsiuteqartut Qeqertalik Business Council akunnermiliuttoralugu qaammatit pingasukkaarlugit ataatsimiittarnertik ingerlappaat. Ataatsimiinnermi matumani peqataasut akunnerminni paasissutissanik avitseqatigiipput, ulluinnarnilu unammilligassatik kissaatitillu eqqartorpaat. Ataatsimiinnerit taama ittut pisariaqarput, inuiaqatigiinni ineriartornermik ataatsimoorluni aaqqiiniaaqitigiiffiusaramik.
Siulersuisut ataatsimiinnerat
Qeqertalik Business Councilip siulersuisui matumani sapaatip akunnerani ukioq manna siullermeerlutik ataatsimiipput. Ukiumullu pilersaarummi Qeqertalik Business Councilip Destination Diskobayillu suliassarpassui suliniuterpassuilu siulersuisunut saqqummiunneqarput. Matumanilu siulersuisut periusissiarisimasaminnit ulluinnarni sulissutigineqarnerini tigussaasunngortinneri paasisaqarfigaat, suliniutillu ingerlatagut sunniuteqaqataaffigisaminnik eqqartorlugit.
Tusassimit pulaartoqarneq
Tusassimiit pisortaanertut tunuartoq Kristian R. Davidsen ingerlatsivimmilu pisortaanertut atorfineqqammisoq Toke Binzer pulaartoraagut. Pulaartutta Tusassimi periusissiarilerumaagartik pillugu eqqarsaatitik oqaluttuaraat, uagullu arlaatigut Tusassip siumut pilersaarusiornerminni eqqarsaatigisariaqagaannik ilanngussassaqarnersugut tusarniaaffigaluta. Matumani kommunitsinni nuna allanngutsaaliugaalersussaq eqqartukkatta ilagaat, isumannaallisaanerullu qanoq pitsanngorsarneqarsinnaanera mobiilinut internetsimullu attaviit eqqarsaatigalugit sakkortusaavinnut aalajangersimasunut attaviit nutarterneqarsinnaaneri eqqartorparput. Taakkununnga ilanngullugu takornarissanut attaviit pisiarineqarsinnaasut Greenland Travel Sim kiisalu suliffeqarfinnut mikisunut anginerumaanullu nioqqutit, pisariaqartitsineq aallaavigalugu naleqqussaavigineqarsinnaanerat aamma eqqartorlutigu.
Sullissinermut pikkorissaaneq
Kommunitut sanilitta mittarfeqarnikkut allilerinissaannut atatillugu, piareersaatitta ilaattut innuttaasutsinnut iluaqutaasussamik piginnaasatigut ineriartortitsinermik suliaqarpugut. Tallimanngormat ulloq ilivitsoq atorlugu pikkorissaavugut, piorsarsimassuseq, kinaassutsit kiisalu attaveqariutsit aaqqiagiinnginnermilu iliuusissat ukkanneqarlutik pikkorissaassutigineqarput, sullitap inissisimanera naapertorlugu pitsaasumik sullissisinnaalernissaq anguniagaalluni.
Ataqqinartunik tikeraarteqarneq
Akunnerup naanerata nalaani Inuussutissarsiornermut Takornariaqarnermullu Naalakkersuisoq Naaja H. Nathanielsen, Visit Greenlandip pisortaa Anne Nivíka Grødem kiisalu Nalik Venturesip pisortaa Thomas ‘Ty´ Mogensen pulaartigaagut. Takornarialerinermi inatsisissaq isummattalu tusarnissaat pillugit kommunimi politikkerit, takornarialerisut innuttaasullu naapippaat. Ilaatigut innutaasunik peqataatitsinissaq, akitsuusersuinerit, ilinniartitaanikkut nukittorsaanissat kommunitsinnilu sumiiffiit assigiinngitsut zonenut aggulunneqarnissaat eqqartukkatta ilagaat. Taakkulu saniatigut aamma Visit Greenland Nalik Venturesilu akunnitsinni suleqatigiinnitta suli nukittunerulernissaa periarfissagullu pillugit qanimut oqaloqatigaagut.
