Ukiormanna AdventureELEVATE Kitzbühel, Østrigimi ingerlanneqarpoq. Takornarialerinermi aqutsisoq Navarana Bidstrup, Destination Diskobayimiit peqataatinneqarpoq Qeqertalimmilu immikkoortortaqarfik avammut nittarsaallugu. Kalaallit Nunaanniit takornarialerinermi siuarsaaqataasut arfineq marluk allat peqatigalugit.

Aaqqissuussaq nunanit 39-nit nunavissuarniillu tallimaneersunit peqataaffigineqarpoq.

Sammineqartut pingaarnerit ilagaat isumannaallisaaneq, piffissamilu uani tulluarluinnartuuvoq. Tassami Naalakkersuisut takornariaqarnermik inatsisissaq suliarileruttorpaat, ilaatigut takornarialerisut isumannaallisaanermut allaaserinninnissaat piumasaqaataasussaalluni.

Sammineqartup pingaarutillit aappaa tassaavoq piujuaannartitsineq. Matumani eqqaaneqarpoq angalariaaseq ’’Slowcal’’ ingerlanneqarnerusariaqartoq. Tassa imaappoq  piffissami annerusumi piffimmi ataatsimi takornariarneq, pinngortitamut minnerpaamik sunniuteqarnissaq nunaqavissullu misigisassarititaasa ukkanneqarnissaat siunertaralugu.

”Qeqertaliup AdventureELEVATEmi nittarsaannissaanut peqataasinnaanera nuannaarutigeqaara. Aammattaaq Nuummi Ilulissanilu mittarfittaassat Kalaallit Nunaanniit avammullu angalanissamik ammaassisussat immikkut nuannaarutigalugit saqqummiuppakka.

Nunattami immikkoortuani Qeqertarsuup Tunuani kaajallaalluni angalaarnermi, illoqarfiit nunaqarfiillu angalaffigisassat immikkuullarilluinnartumik misigisaqarfigineqarsinnaasuupput. Nunarsuarmi takornarianik angalanissamik aaqqissuussisartut, nittarsaassassanik nutaarsiassiisartut aammattaarlu ornitassanut ineriartortitsisartut allat, uani aaqqissuussami oqaloqatigisinnaasimagakkittaaq nuannaarutigaara’’ Taamak oqarpoq Navarana Bidstrup, Destination Manager.