AdventureELEVATE – Takornariaqarnikkut niuerneq Amerika avannarlermi Denver, USA-mi maajip naanerani ingerlanneqarpoq. Qeqertalimmi takornarialerinermi aqutsisoq Navarana Bidstrup immikkoortortaqarfik Destination Diskobay sinnerlugu peqataavoq. Kalaallit Nunaanninngaannersut Visit Greenland, Explore North Greenland, Arctic Circle Business, takornarialerinermilu namminersortut allat peqatigalugit.
Aaqqissuussami saqqumiinerit ataatsimiinnerillu soqutiginartut arlaqartut ingerlanneqarput.
Ilaatigut nunarsuarmi takornariangassatut tikitassaniit aallartitaasut ataatsimeeqatgiipput. Unamminartut, misilitakkat ilisimasallu avitseqatigiiffiullutik.
Saqqummiunneqartut ilaanni Affiliate Marketing periarfissaaneruleriartornera sammineqarpoq, pingaartumik misigisassarsiortitsilluni takornarialerisunut, tassani suliffeqarfiit avammut nittarsaassinerminni aningaasanik annertuumik atuinngikkaluarlutik suliffeqarfinnik allanik suleqateqarnikkut atuisussanullu eqqortumik apuussinikkut akikinnerusumik nittarsaasseriaaseq aaqqiissutaasinnaanera saqqummiunneqarluni.
Minnerunngittumillu angalatitsisartut tikitassanik toqqaassatillutik paasissutissanillu aallerniaraangamik YouTube atorluarneruleriartoraat paasissutissiissutigineqarpoq.
Sammineqartut pingaaruteqartut ilaat tassaavoq suliffeqarfiutilittut ajutoortoqarsimatillugu qanoq suleriuseqartoqarsinnaanersoq. Ilaatigut inatsisinut tunngasut, ajornartoorfinnillu qanoq piareersartoqarsinnaanersoq piviusuusaartitsinerit aallaavingalugit piareersaatigineqarsinnaasut saqqummiunneqarput.
Takornarialerinermi aqutsisoq aaqqissuussaq una pillugu imak oqaaseqarpoq:
’’Aaqqissuussami uani saqqummiisut ataatsimiinnerillu saniatigut pingaaruteqarluinnarsimavoq Destination Diskobay, Kommune Qeqertalimmeersoq nittarsaassinermi peqataatissallugu. Piffissammi uani Amerikarmiut Kalaallit Nunaat assut soqutigivaat, Newark-miillu Nuummut juunimi toqqaannartumik timmisartuussisoqartalertussaanera pissutigalugu.
Kalaallit Nunaanni Nuuk takornariarfissatut kisiat periarfissaannginnera paasititsiniutigaarput. Pingaartumik sumiiffitsinni periarfissarpassuaqarnerput, nunaqavissut takornarialerisut unnuisarfiillu misigisassarititai asseqanngitsut, paasissutissallu allat pingaarutillit angalatitsisunut soqutiginnittunullu saqqummiuppagut. Taamaasilluni Qeqertarsuup tunua nunat assigiinngitsut akornanni takornariarfissatut periarfissaanera toqqarneqarsinnaaneralu nittarsaanneqarpoq.
Qujaffigerusuppagut Visit Greenland aamma Nalik Ventures peqataanermut akiliut tapiissutigisinnaasimammassuk, taamaasillutik Qeqertalik takornariarfissatut nunanut tamalaanut nittarsaannera piviusunngortitseqataaffigaat.’’