Sapaatip akunneranni 31 aamma 32-mi Qeqertalik Business Council suleqatiminnik Nalik Ventures’imit tikeraarneqarpoq, taakkuuppullu ulluinnarni inuussutissarsiutitigut nutaaliornikkullu nunarput tamakkerlugu siuarsaallutik Nuummiit suliaqartut.
Arnajaraq Ravnshøj-Davidsen kommuneqarfinni Qeqertalimmi Kujataanilu immikkut siunnersuisussatut atorfeqartoq, suleqatinilu Sermersuumeersoq Augusta Lundblad peqatingalugu Qasigiannguanut, Qeqertarsuarmut kiisalu Aasiannut tikeraarput. Angalaqatigiinnermilu Qeqertalik Business Councilip pisortaanera Gerth P. Olsen peqataavortaaq.
Angalanerullu siunertaraa aallarnisaarusuttunik kiisalu inuussutissarsiuteqareersunik ataatsimeeqateqarnissaq. Matumanilu ullut marlukkaarlugit illoqarfiit najorneqarput, taamaasillunilu aallarnisarusuttunik oqaloqateqarsinnaaneq kiisalu avitseqatigiissinnaaneq minnerunngitsumillu suliffeqarfinnut pulaarsinnaaneq pisinnaasimalluni.
Qasigiannguani sanaartorfimmiit kaffisorniartarfinngortussamut
Qasigiannguaniinnermi ilaatigut Thomas Hjort TH Qas Byg ApS’-imeersoq oqaloqatigineqarpoq, taassumalu illu sanaartorfiusoq siunissami kaffisorniartarfissatut takorluugaasoq takornartippaa. Oqaloqatigiinnermilu ilaatigut taakkartorneqartut tassaasimapput Nalik Venturesip aallarnisaanermi ilisimasaminik avitseqateqarlunilu siunnersuisinnaanera.
“Nalik Ventures kiisalu Qeqertalik Business Council toqqaannartumik qanimut oqaloqatingalugit pissarsiaqarluarnarpoq, pingaartumik illoqarfimmi mikinerusumi suliffeqarfeeraalluni ungasinngitsumi aallarnisarnikuulluni. Taakkumi misilittagaat attaveqaataallu periarfissanik isummanillu atorluaanerusinnaanermik pilersitsipput.” Taama oqarpoq Thomas Hjort TH Qas Byg Aps-imeersoq.
Qeqertarsuarmi takornariaqarneq
Qeqertarsuarmiinnerminni ilaatigut takornariartitsinermik suliaqarlutik nersornaaserneqareersut Disko Adventuresimeersut, Danny Mølgaard aappaalu Naja Bjerregaard naapisimaarneqarput. Taakkulu neqeroorutitik pioreersut siusiunissamullu pilersaarutitik saqqummiuppaat – Ilaatigut tuniniaavissatut allaffeqarfissartik illoqarfiup qeqqaniittoq, tikeraanut kiisalu umiarsuit ilaarsortaatiniit takornarianut naapeqatigiiffiulluarsinnaasoq sammineqarluni.
“Namminersorlutik inuussutissarsiutillit taama qanimut naapillugit immikkuullarissumik pissarsiffiusarpoq, tamannalu nalunaarusianit mailikkullu attaveqatigiinnermiit annermik pisarluni. Ineriartortitsineranni aporfiusinnaasut, kisiannilu aamma nukittoqqutaat paasilluarsinnaasarlutigit – tassanilu ataatsimoorluta aaqqiissuteqarnissamut alloriaqqissinnaasarluta.” Taama oqarpoq Arnajaraq Ravnshøj-Davidsen, Nalik Venturesimi Inuussutissarsiutilinnut Siunnersorti.
Aasianni takorluukkat nutaat siammasittullu
Aasiannittaaq minnerunngitsumik aallarnisaasut inuussutissarsiutillillu ataatsimeeqatigineqarput – Suliniutit annertunngitsuniit takorluukkanut annertuunut immikkoortortaqarfitsinnut ilippanaatilinnik eqqartuisoqarpoq.
“Eqqarsaatit takorluukkallu assigiinngitsorpassuit naapittarpagut, tamarmillu immikkut eqqummaariffigineqassapput. Taakkuuppummi inuiaqatigiinni ineriartortitsillutillu uummaarissaaqataajumaartut.” Taama oqarpoq August Lundblad, Nalik Venturesimiit Siunnersorti.
Suleqatigiinneq ingerlalluartoq
Qeqertalimmut tikeraarneq Nalik Venturesip Qeqertalik Business Councilillu ataavartumik suleqatigiilluarusunnerannik aallaaveqarpoq, suleqatigiinnillu inuussutissarsiornikkut immikkoortortaqarfimmi ineriartorluarnissaq ukkatarineqarluni suliniutigineqarpoq.
“Inuttut qanimut oqaloqatigiinneq pitsaanerussuseqartuaannarpoq – ineriartornerisa qanimut malinnaaviginerisigut sukumiinerusumik iluaqutaanerusumik siunnersuisinnaasaratta.” Taama oqarpoq Gerth P. Olsen, Qeqertalik Business Councilimi pisortaaneq.
Siunissamullu pilersaarutaavoq, soqutigisaqaqatigiit akornanni, Qeqertalimmi ataavartumik qanimut naapisimaartoqartarnissaq siunertaalluni tikeraartoqartassasoq – Tassanilu Qeqertalimmi Inuussutissarsiutitigut Siunnersuisoqarfik siunissamut ineriartorluarnissamut sukataaruteqarluni suleqataajuassaaq.
