Qeqertalik Business Council anguniagaannut ilaavoq piujuaannartitsinermik anguniagaqarnissaq Kommune Qeqertalimmilu aamma taanna pillugu pikkorissaasarneq ataavartumik ingerlanneqartarpoq.
Qeqertalik Business Council Kommune Qeqertalimmi najungaqarfinni tamani ukiut tamaasa angalasarpoq tusarniaallutik, pikkorissaallutik aammalu inuussutissarsiuteqarnikkut pilersitserusuttunik oqaloqatiginnillutik siunnersuisarlutillu.
Peqataasartut aammalumi piujuaannartitsinermik pingaartitsisut ilagivaat Kirsten S. Pedersen.
Kirsten namminersortuuvoq aammalu Kuannit Art -mik piginnittuulluni.
Kuannit Art Qeqertarsuarmi pisiniarfeeraavoq piujuaannartitsinissamik anguniagaqarluni ingerlasoq. Kirsten pingaartitarivaa nunatta pissarititai atorlugit niuernikkut inerisaanissaq. Taassuma saniatigut illoqarfimmi unnuisarfiuteqarpoq, taakkualu aasaanerani takornarinik atorluarneqartartunik.
Kirsten piujuaannartitsinermik pingaartitsinera pillugu aperigatsigu imannak nassuiaavoq :
”Qeqertarsuup pinngortitaa atorluarlugu nunatta pissarititaanik ulikkaartoq niuernikkut ineriartortinneqarsinnaavoq, nunataalu paarilluartariaqarluni. Taamaattoqassappat nuna paarilluartariaqarpoq maangaannarlu eqqaasoqannginnissaa pingaaruteqarpoq.
Aasaanerani takornariaqarluarnerani Kuannit Art-mi takornarissat pinngortitamik atorluaanera nuannarisarpaat. Soorlu assersuutigalugu poortuutissat atoqqitanik pisiat poortorneqaraagata, imaluunniit Qeqertarsuup naasuinik the-liassat pisiariumanerusarlugit.
Kuannit Art aamma pingaartitarivaa Qeqertarsuarmi najugallit assassugaannik imalunniit eqqumiitsuliaanik pisiassaateqarnissaq, taamaalillunilu nunaqavissunut tamanut iluaqutissanngortinneqartarlutik. Tamannalu takornarissat ornigalugulu pilerigisarpaat.
Kommune Qeqertalimi nunatsinnilumi piujuaannartitsinissap annertusarneqarnissaa pingaaruteqarpoq aammalu tamatigut ineriartortinneqarnissaa kissaatiginarluni”
Illit aamma piujuaannartitsinermik soqutigisaqaruit imaluunniit aallartisarnissamik eqqarsaateqaruit Qeqertalimmi sumiikkaluaruit, sianerlutit, mailerlutit siunnersonqarnissamik inniminniisinnaavutit.
