Sapaatip akunnerata siuliani Destination Diskobay kiisalu Explore North Greenland suleqatigiinnerisigut, Ilulissani Sermermiut Kultorikkut illorsuani ataatsimiisitsipput, tamannalu Ilulissani takornarialerisunik 13-nik peqataaffigineqarpoq. Naapeqatigiinnerup siunertaraa Qeqertarsuup Tunuani takornarialerisut ataatsimut suleqatigiinnerisa nukittunerulersinnissaa kiisalu takornarissat piffimmi angalaarnissaannut periarfissagissaarnerulersinniarlugit.
Ataatsimiinnermi pisortaq Gerth P. Olsen tikilluaqqusivoq ullormullu sammisassat saqqummiullugu, siunertaq qitiulluinnartoq tassaalluni Qeqertarsuup Tunuani takornarissanik angallassinissamut eqaannerulersitsinnisaq. Kinguneranilu Takornariaqarnermik Ataqatigiissaarisoq Navarana Bidstrupip Destination Diskobay nittartagaani periarfissat paasissutissallu arlaqartut saqqummiullugit.
Ilaatigut sumiiffimmi illoqarfiit nunaqarfiillu assigiinngitsut takorannersuutaat kiisalu taakkunani takornarialerisut kikkuunersut, takornarianit suleqatigisartakkanillu atorluarneqarsinnaanngorlugit nittarsaanneqarneri saqqummiuppai.
Ataatsimiinnermi soqugineqarluartumik saqqummiipputtaaq Disko Adventures Qeqertarsuarmi aallaaveqartut. Tassanilu pilersitseqatigiit Danny Mølgaard kiisalu Naja Bjerregaard Teamsikkut piffimminni immikkut ittumik neqeroorutitik ilaatigut qaqqap qaani qimussiussisinnaasarnertik qamuteralannillu angallassisinnaasarnertik saqqummiullugit. Kiisalu aasaanerani avatagiisiminni kusarnartorsuami pisuttuartitsisarnertik oqaluttuaralugu. Disko Adventures, takornarialerinermi alutornarluinnartumik angusaqarnerminnik, nersornaat Greenland Tourism Award 2024 pinnassimavaat.
Takornarialerisut akornamminni suleqatigiinnerulersinnaanermik eqqartueqatigiinnissamik periarfissiilluni toqqammaviliivoq. Qeqertarsuup Tunuani takornarianut neqerooruterpassui siammasipput, ilaatigut imaatigut angallassinerit, pisuttuaassinerit, aalisartitsinerit, anguniarnerit unnuisitsinerillu. Tamakkuninngalu suliaqartut akornamminni suleqatigiinnerulerunik, angallassinerit susassaqartitsinerillu ataqatigiissarluarneqarnerulersinnaapput, soorlu illoqarfiit nunaqarfiit akorngini angallassinernut, nunap immikkoortortaqarfianut tikeraanut tikikkuminarnerulerneranik soqutiginarnerulerneranillu kinguneqalersissinnaallugu.
