Oktobarip 28. – 30.-ani Hotel Arcticimi kiisalu Hotel Ilulissani mittarfissuassaq pillugu Avannaani Qeqertalimmilu inuussutissarsiutilinnut takornariaqartitsisunullu isumasioqatigiinneq ingerlanneqarpoq. Isumasiuinermi saqqummiisut ilaatigut tassaapput Air Greenland, Visit Greenland, Avannaata Kommunia minnerunngitsumillu Qeqertalik Business Council aammalu Destination Diskobay, mittarfissuartaarneq sioqqullugu eqqarsaatit isumalluutillu namminneq isiminniit isigalugu saqqummiussaqarlutik. Isumasiuneq peqataasunit eqimattakkaarluni eqqartueqatigeereernikkut saqqummiussinermik naggaserneqartarpoq, ilaatigut unamminartut, periarfissat kiisalu kissaatit peqataasunit oqariartuutigineqarlutik.

Isumasiuneq mittarfissuartaarnissamut immikkoortortaqarfimmi najugaqartunut periarfissanngorumaartunik sammisaqarnikkut, alloriarneq siullertut qanimut tusarniaanerutingaluni isumasiuinerulluni.

”Isumasiuinermut peqataatinneqarsinnaanerput nuannaarutingeqaarput, Ilulissani mittarfissuartaarnissap kingunerisassai Qeqertalimmi immikkoortortaqarfitsinnuttaaq attuumassutissaqarluarumaarmata. Qularnanngilarmi immikkoortortaqarfitsinni nunaqarfiit illoqarfiillu takornarissanik amerlanernik Ilulissaniit toqqaannaq orningarneqarnerulerumaartut. Taamaattumik mittarfissuartaarnissaq sioqqutsillugu piareersaatissavut inerisartariaqarpagut, neriulluta Qeqertarsuup Tunuani soqutigisaqatigut tamarmik peqatingalugit aaqqissuussaqarsinnaajumaarluta.” Taama oqarput Nivé & Frank Diskobay Toursimiit.

Isumasiuineq una Avannaata Kommunianit aaqqissuunneqarpoq, tassanilu Qeqertalimmiit soqutigisallit aggersagaasinneqarsimallutittaaq. Alloriarnerup tullissaa Qeqertalik Business Councilimit aaqqissuunneqarnissaa naatsorsuutaassaaq, Ilulissani isumasiunerup killiffianiit angusat nangeqqissinnaatikkumallugit. Tamannalu Avannaani Qeqertallillu kommuneqarfiisa akornanni suleqatigiilluarnerulernissamut, ataatsimoorussamillu immikkoortortaqarfitsinni takornariaqarnermik pilersaarummik siunnerfeqarnissamut tunngavilersuutaalluarumaarluni.