Sapaatip akunnerata siuliani, angallassinermik suliaqartut katersuunnersuat Vestnorden, Nuummi ingerlanneqartumi Avannaamioqatigiit Killiineersuninngaanniit takornariaqartitsitsinermik inerisaasunit peqataaffigineqarpoq. Tamannalu sioqqutilaarlugu ataatsimeersuarnermi peqataasussat nunanit tamalaaneersut sioqqutsisumik Qeqertarsuup Tunuani immikkoortortaqarfimmi misigisassarpassuit takornariaqqaarpaat.
Tallimanngornerungaa angalatitsisartut isikkanillit piumassuseqarluarlutik soqutiginneqalutillu sioqqutsisumik takornariniassallutik Aasiannut tikipput. Seqernarissuup ataani Destination Diskobayimiit tikilluaqquneqarput kinguninngualu Qasigiannguanut angallanneqarlutik. Taakanilu tupermi unnuisarfimmi ilaatigut ”nammineerlutik nerisassaminnik imigassaminnillu pilersussallutik” pilersaarutaanni misigisassaqartinneqarsimallutik. Sioqqutsilluni angalanermi misigisassarsiornerit tamarmik Destination Diskobayimit kiisalu immikkoortortaqarfinni angallassisartunit aaqqissuunneqarsimapput.
“Immikkoortortaqarfitsinni misigisassat immikkuullarilluinnartut angalatitsisartunut nunanit tamalaaneersunut, immikkoortortaqarfitsinni takornarianut angallassisartunit takornariartinneqarnissaat Destination Diskobayimut pingaaruteqarluarsimavoq. Neriuutingaarpummi takornarissanik angalatitsiviit takornarissat Qeqertarsuup Tunua tamakkerlugu angallavigitissallugu siaruarterumassagaat,” taama oqarpoq Linda Kleist, Destination Manageri.
Pilersaarut imartooq angusaqarfiulluartoq
Camp Qinnguani unnuereernerup kingorna Qeqertarsuarmut ingerlaaqqinnginnerminni, angalatitsisartut Qasigiannguani katersugaasivimmut alakkaatinneqarsimapput, ilaatigullu Nunaqarfik Uumassusillip sannavia takornariarneqarsimalluni. Qeqertarsuarmullu apuussimaleramik sissap saannguanut saunariartinneqarput. Qaqqat innermik anitsinermik pilersitaat umiatsiamik alakkarneqareermata, Qeqertarsuarmi takornarialerisut eqqumiitsuliortullu naapisimaarpaat. Kingorna Aasiannut utersimaleramik illoqarfimmi pisuttuarlutik eqqumiitsuliat assigiinngitsut alapernaaffigaat.
“Pilersaarut imartugaluaqisoq, Destination Diskobayimit suleqatigiinneq kiisalu angalatsitsisartut peqatigalugit immikkoortortaqarfitsinni angalaarneq pissarsiffiulluarsimasutut nalilerparput. Upperaarput tamanna siunissaq ungasinnerumaaq isigalugu, takornarianik angallassisartunit aamma pissarsiffiulluarumaartoq. Tassami piginnaasatik takutissorluarmatikkit, suleqatigiilluarnerpullu nuannaarutigeqalutigu, ” taama Linda Kleist oqaluttuarpoq.
Sioqqutsisumik angalaareernerup kingorna, angalanerup siunertavia, tassaasoq angalatitsisartunut, takornarialerisunut nittarsaassisartunullu Vestnorden ataatsimiisitsinera Nuummi ingerlanneqartoq kateriffiuvoq. Tamannalu ilaatigut Islamindimiit, Nunatsinniit Savalimmiuniillu susassaqartitsisartunik inuttalersorneqarluni ingerlanneqarpoq, tassanilu nunanit tamalaanit angalatitsivinnik alapernaaqisunit aamma peqataaffigineqarluni.
Qeqertarsuup Tunua Ilulissanut tapitartuutaalluarsinnaasoq
Kinguuaattoorneqalaaraluartumik sioqqutsisumik angalaqatigiit Qeqertarsuup Tunuaniit Nuummut apuupput, ilaatigullu Destination Diskobayimit immikkoortortaqarfitta immikkuullarissusaanit avammut nittarsaassinissaa siunertaralugu peqataaffigineqartumik.
”Soqutiginarluinnaqqissaarsimavoq takornariat nunatsinni immikkoortortaqarfigut akimorlugit siaruarterneqarnissaat periarfissaqarluartoq arlalinnik takuneqarsinnaasimammat. Tamatumanilu immikkoortortaqarfitta Ilulissanut tapitartuulluarsinnaanera pissusissamisoorpoq, tassami illoqarfivut imminnut tamarmik qanittunnguummata,” taama Linda Kleist oqarpoq nangillunilu:
“Taassuma saniatigut angalatitsisartut oqariartuuteqarput Kalaallit Nunaat piviusoq ilumoortorlu takuniarneqarusuttartoq, kiisalu asimi takornariarusunneq siaruariartuinnartoq. Tamannalu uatsinnut periarfissatsialassuuvoq, tassami piumasaat taakku Qeqertarsuup Tunuani pioreermata”.
Aappaagu VestNorden ataatsimooqatigiinnissaq Islandimi katersuuffiussaaq. VestNorden pillugu maana paasisaqarnerugit.
