Destination Diskobay ulluni makkunani immikkoortortaqarfitsinni takornariaqarnerup piorsarneqarnissaanik suliuniteqartup, Vestnorden Travelmart 5. – 7. oktobarip akornani Keflavik, Islandimi ingerlanneqartoq peqataaffigalugu Qeqertalik nittarsaappaa.

Aaqqissuussaq una nunarsuaq tamakkerlugu tuninniaasunik pisisartunillu najuuffigineqarluartoq, angalatitsivinnit, akunnittarfinnit, takornariartitsisunit, namminersortunillu katillugit 118-ninik amerlasusilinnik nioqqutiminnik sullississutiminnillu tuniniaasoqarpoq, pisisartunillu neriuuteqarluartunit katillugit 178-usunit malinnaavigineqarput, taakkulu nunarput immikkoortortaqarfippullu Qeqertalimmi ilisimasaqarfiginerorusuppaat.

Takornarialerisoqartitsisorput agentinik arlalissuarnik oqaloqateqarpoq, ilaatigut Kinamiit, USA-miit, UK-miit, Tysklandimiit, Norgemiit Islandimiillu qanimut immikkoortortaqarfipput pillugu kiisalu Qeqertalimmi susassaqartitsisartut neqeroorutaat paasisaqarfiginerusuppaat.

Covid-19-mut killilersuinerit annikillerneri ilutigalugu takornarissat immikkoortortaqarfipput tikeraarsinnaaleqqippaat, assullu killilersuinerup nalaani arajutsisimasat pinngorartitaasimasut soqutigineqarlutillu isumalluarfigineqarput.

”Una piviusoq Qeqertalimmi immikkoortortaqarfitta, takornariaqarneq eqqarsaatingalugu avammut nittarsaassisoqarfeqalernera, siornatigormiit sanilliullugu periarfissaqarlualersitsillunilu nalissaqanngitsumik eqqartorneqarnerulersinnaalerpoq. Timitalerlugu peqataaneriinnarput uppernassuseqarnerulersitsivoq kiisalu siunissaq eqqarsaatingalugu avammut attaveqaatissanik, Qeqertaliup nunarsuup sinneranut qaninnerulernissaanut pilersitsilluni”. Taama oqarpoq Destination Manageri, Linda Kleist.