Vestnorden Travelmart 2024
Takornarissanik angallassisartut pisisartullu niuffaffigigisartagaat ukiumoortumik ingerlanneqartartoq matumani Savalimmiuni pivoq. Tamannalu Destination Diskobay Pisortaaneranik Gerth P. Olsenimit kiisalu Takornariaqarnermik Ataqatigiissaarisumit Navarana Bidstruppimit peqataaffigineqarportaaq, soorlu aamma nunatsinniit suliffeqarfiit takornarissanut assigiinngitsunik nunani tamalaani takornariaqartitsinermik pisisartunut neqerooruteqartartut 34-t allat peqataasuttaaq. Niuffannissaarsuarmi inuit peqataasut katillugit 412-t missaaniipput, taakkunani nunani tamalaaniit pisisartut tuniniaasullu ataatsimut.
Niuffannerup aallartinnissaa sioqqutsilaarlugu takornariaqarnermik ataqatigiissaarisut nunatsinneersut, Visit Greenlandip aaqqissungaanik isumasioqatigiisitsinermi peqataapputtaaq. Pisumi ilaatigut avammut nittarsaassinermi neqeroorutit periarfissallu nutaat taakkartorneqarput, oqaluttualioriaatsit kiisalu nuna tamakkerlugu meqqimik ilasarnaasiornermut suliamik saqqummiivigineqarlutik – Qulequttat takornarissanut nunatta avatagiisaanut tikilluarsaasioqatigiinnissamik siunertaqarluni aqqutissiueqataasut. Isumasioqatigiinnermi peqataasut akornanni avitseqatigiinnissamut paarlaaqatigiinnissamullu periarfissiilluarpoq, tamannalu ilutsinni suleqatigiilluarnissamik kiisalu nunatsinni avatagiisitta avammut neqeroorusiaralugu, nunat tamalaat akornanni nunamik nittarsaassinermi siuuttuunissaanik anguniagaqarfiuvoq. VG nutaarsiassiissutaa uani atuaruk.
“Angalanermut aaqqissuisartut nunani tamalaaneersut 19-it Torshavnimiinnitsinni ataatsimeeqatigaavut, tamarmik immikkut assigiinngissusilinnik sullitaqarlutillu soqutigisaqartut. Angalasitsisartut misilittagaqarluarnerit siornatigut ilisimasarileriikkavut nutaanik periarfissanik tusarlerneqarnissartik assut soqutigaat, tamakku sullissaminnut aalajangersimasunut naleqarnerulersitseqqitarmata”. Taama oqarpoq Gerth P. Olsen.
Uani aaqqissuussami pisut annerpaartaasa ilaat tassaavoq nersornaasiisarneq Greenland Tourism Award 2024. Ukioq manna ataqqinarluartumik nersonaasiineq Qeqertarsuarmeersunut Disko Adventuresikkunnut tunniunneqarpoq, matumani nutaaliorsinnaassusaannut takornariaqarnerullu nunatsinni ineriartorluarnissaanut tunniussaqarnerannut tunngatillugu nersorniarneqarput. Nutaarsiassissuterput uani atuaruk.
Vestnorden Travelmart 2024 taamaattumik nioqqutinik nutaanik saqqummiussiviuinnarnani aamma suleqatigiinnermut kiisalu nunatsinni takornariaqarnerup ineriartorluarnissaanut suleqatigiinnermut aallarnissaaqataavoq.
Savalimmiuni isumassarsiorluni angalaneq
Vestnorden Travelmart naammassisimalermat Navarana Bidstrup aamma Gerth P. Olsen Savalimmiut qeqertaasa kusanarluinnartut akornanni isumassarsiorniarlutik angalaarput. Angalanerminnilu qitiusumik inuussutissarsiutitigut takornariaqartitsinikkullu suliaqartut ataatsimeeqatingalugit. Ilaatigut illoqarfiit pingaarnersaata avannaatungaaniittut Visit Runavík kiisalu Visit North Klaksvíkimiittoq pulaarpaat, tamarmik sumiiffitsinni assigusunik unammilligassaqarlutik suliaqartut. Eqqartukkallu ilaatigut tassaapput allagartalersuinermi periuutsit, tikeraat sumiiffinnut eriagisassanut orniguttarnerisa kinguniperluutaat kiisalu ukioq naallugu takornariaqartitsiniarnermut suliniuteqarneq.
Takornariaqartitsinermi suliniutit saniatigut Vinnuhusið pissarsiffiulluartumik pulaarneqarpoq, taakkulu tassaapput Savalimmiuni Sulisitsisut Kattuffiat, uani suliniutaat paasisaqarfigilluarneqarput Savalimmiunilu inuussutissarsiuteqarnerup silarsuaani kisitsisit saqqummiunneqarlutik.
