Oktobarip 22-23-ani Oslo Norgemi AECO (Association of Arctic Expedition Cruise Operators) ukiumoortumik ataatsimiisitsinera ingerlanneqarpoq. Ulluni pingasuni ingerlanneqarnerani nunani issittuni immikkoortortaqarfiit ilisaritinneqarnerisigut aallarnerneqarpoq, kinguneranilu nuna immikkoortortaqarfianni takornariaqarnermik aqutsisoqarfiit (DMO), takornarialerisut angallassisartut kiisalu umiarsuaatileqatigiit naapeqatigiillutillu ilasseqatigiipput.
Ukioq manna Kalaallit Nunaanniit peqataasut aatsaat taama amerlatigipput, DMO-t, angalatitsisartut angallatinillu takornariartitsisartut peqataallutik. Nunatsinniit peqataasut uagullumi AECO ilaasortai ilisarisimasarinerulernissaanik siunertaqarluta peqataavugut – pingaartumik umiarsuit takornariartaatit ilisimasassarsiorlutik nunatsinni Qeqertalimmilu angalatitsisartut naapikkusullutigit. Peqataanitsinni Destination Diskobay avammut nittarsaapparput immikkoortortaqarfittalu neqeroorutai periarfissarpassuilu saqqummiullutigit.
“Qujarusuppunga AECOp sumiiffitta Destination Diskobay – Qeqertaliup saqqummiunnissaanut qaaqqusimammanga.
Sumiiffitsinni sammisassat, nittartakkatsinniittut paasissutissat, takornarialerisut, unnuisarfiit, neriniartarfiit sammisassallu saqqummiunneqarput. Umiarsuillu tikittartut ukiuni kingullerni arfinilinni qanoq isikkoqarneri qanorlu umiarsuarnut takornariartaatinut suliniuteqarnerluta saqqummiullugit.
Saqqummiinerup saniatigut attaveqaatigeriikkat naapippagut oqaloqatigalugillu. Ilaatigut umiarsuit takornariartaatit tikeraarnerminni suut iluatsissimanersut suullu unamminarsimanersut eqqartorlugit. Minnerunngitsumik attaveqaatinik nutaanik pissarsinerput nuannaarutigaara”
Ullup aappaani angallassuup Ponantip pisortaanera oqalugiarluni saqqummiivoq, kinguneranilu nuna issittumi umiarsuit takornariartitsisartut anginerpaat sinniisui peqatigiillutik oqalliseqatigiipput, ilaatigut suliaminni unamminartitatik kiisalu periarfissatit eqqartorlugit saqqummiipput.
Nuna Issittumi nunat naalagaaffeqarfii soorlu, Svalbard Norge, Island kiisalu namminersorlutik oqartussaniit Nunavummiit nunatsinniillu politikkikkut aalajangersaatit nutaat, matumani angallatinut takornariaqartaassuarnut sunniuteqartut saqqummiunneqarlutik. Inuussutissarsiornermut Naalakkersuisoqarfimmiit Salik Hard peqataavoq nunatsinnilu takoriaqartitsinermi inatsisissat, nuna immikkoortigaanerata, sumiiffinni ingerlatsinissamik akuersiisarnermullu tunngasunik peqataasunut 150-t missaaniittunut saqqummiivoq. Peqataasullu suliaminnut sunniutaasussanut annertunerusumik Saliup saqqummiineranut apeqqutilliinngillat.
“Maanngaanniit aallarpugut misingaluta umiarsuaatileqatigiiffiit qanilliallaqqilaarsimallutigit. Makku ataatsimoorfiit ilasseqatigiittarnerillu pisariaqavipput, pingaartumik immikkoortortaqarfitsinni umiarsuit takornariartaatit ilisimasassarsiorlutik angallassisartut amerlanerusut tikisittalerniassagutsigit, illuatungaanilu umiarsuarsuit tusintilikkaanik ilaasullit pinaveersaassagutsigit” taama oqarpoq pisortaq, Gerth P. Olsen ataatsimiinnerup kingunerani.
