Ulluinnarni aallartisartunik siunnersuisarpugut, ilaatigut CVR-normutaarusuttut, aningaasanik atorniarusullutik immersuinissamut siunnersorneqarusuttut, suliffeqarfittut ineriartorusuttut il.il.

Siunnersornikuusatta ilagivaat naqqaniik aallartisarsimasut qatanngutigiit Anders & Nuka-Aqqalu Broberg Qeqertarsuarmeersut aquuteralannik qamuteralannillu mekanikeritut ilinniarnikut, Qeqertarsuarmilu mekanikeritut sullivimmik aallartitsinikut ateqartoq @Nukariit.

Taakku siunnersorneqarsimanertik pillugu imak ilanngussipput:

”Kommunip ataani siunnersuiveqarsimanngitsuuppat, aallartinniarnerput ajornarnerujussuusimassagaluarpoq.” Anders Broberg oqarpoq.

Qeqertalik Business Councilip suleqatigissallugu isumaqatigiissusiorfiginikuuaa @Nalik Ventures taakkulu nuna tamakkerlugu inuussutissarsiornikkut ineriartortitsinermut ingerlatsiviupput ilaatigut aningaasanik atukkiisartuullutik nioqqutinilluunniit ineriartortitsisoqarniartillugu tapiisartut.

Nukariit mekanikeritut sulliviat, umiatsianut maskiinanik kingoraartissanillu tuniniaasuunermi saniatigut, maanna aamma sullitanut assartuissutaasinnaasumik usisaammik biiliuteqalernikuupput Nalik Venturesip nioqqutissiornikkut ineriartortitsinissamut tapiissutai aqqutigalugit aningaasatigut tapiiffigineqarnikkut.

Illit aamma aallartisarusukkuit siunnersorneqarusullutillu Qeqertalimmi sumiikkaluaruit, sianerlutit, emailerlutit siunnersorneqarnissamik inniminniisinnaavutit.