Seqinnarissuarmi arfininngorneq 15. juuni Kommune Qeqertalik suleqatigalugu, Saligaatsoq 2024 50-it tungaannut peqataaffigineqarluni iluatsilluartumik ingerlanneqarpoq. Akunnerit marluk missaanni poorsuit 80-init ikinnerunngitsut kiisalu eqqagassat anginerusut, ilaatigut errorsivikut pallitsikullu katersorneqarsimapput.
Poorsuit aaqqatillu ataasiartakkat STARK Kalaallit Nunaat Aasianniit tapiissutigineqaqqipput.
Saleersuartoqareernerata kingorna ataatsimoorluni grillerisoqarpoq, nerisassat Pisiffik – Aasiaat-nnit, Pilersuisoq Aasiaat-nnit INI A/S-imiillu tunissutigineqarsimallutik. Aammattaaq peqataasut akornanni pinnatassanik makittaarisoqarmat, pinnatassat assigiinngitsut Masant Aasiaat-nnit, Anuni Aasiaat – Atisaarniarfik-mit, Rothberg-Byg Aasiaat -mit Polar Raajaniillu tunissutigineqarsimasut makittaarissutigineqarput.
Makittaarinermi rejenik qerisunik 3 kiilunik makitaasut ilaat Aningaaq Petersen, makittaarinermi najuutinngimmat inussiarnersumik piumaffigissavarput allaffitsinnut pinnataaminik aalleqqullugu.
Peqataasut tapiisullu tamaviisa tapiissuteqarnerannut peqataanerannullu qutsavigingaarpagut.
