Ukioq 2022-mi aallarnisaasut siunnersorneqartut amerlanerusut
Inuussutissarsiutitigut Siunnersuisoqarfik Qeqertalik Business Council 17. maj 2023 Aasianni ileqquusumik ataatsimeersuarput. Ukioq 2022 Inuussutissarsiutitigut Siunnersuisoqarfimmut ulapaarfiusimavoq, Qeqertalimmilu inuussutissarsiutitigut ingerlatsisunut arlariinnik sammisassaqartitsisimallutik.
Sammisassaqartitsinerit tingulaariffigalugit
Inuussutissarsiutitigut Siunnersuisoqatigiit kommunemi inoqarfiit arlallit tikittarpaat, suliffeqarfiit aallarnisaasullu ataatsimeeqatigisarlugit, ilaatigut suliniutit kommunalbestyrelse aningaasatigut missingersuusiornermini imarisassaanik aallerfiusimallutik. Inuussutissarsiutitigut Siunnersuisoqarfiup kommunemut sullissinermut isumaqatigiisut aallaavigalugu pisussaatinneqarnermikkut tamanna ingerlassimavaat.
Qeqertalik Business Council AECO suleqatigineratigut takornarissat innuttaasullu pissusilersuutissaannik, illoqarfinni ataasiakkaani atorneqartussanik suliaqarpoq. Avannaata Kommunea suleqatigineratigut, Qeqertarsuup tunuani takornarissat siammarneqarnissaanut suliaqartoqarpoq, Aasianni aammalu Ilulissani isumasioqatigiinnernik ingerlatsinikkut, suliffeqarfinnik takornarissanillu sullissinermik suliaqartunit peqataaffigineqartumik.
Matumani Qeqertarsuup tunuani suliffeqarfinni, takornariaqarnikkullu suliaqarnermi unammilligassat, inerisaanissamut periarfissat kiisalu nioqqutissanik inerisaanissamut tunngatinneqartut avitseqatigiissutigineqarlutik.
Illoqarfiup iluani, tikeraat nammineerlutik imminnut angallassinnaanissaat eqqarsaatingalugu, ornigarneqarsinnaasunut tikkuussisumik allagartalersuinermi neriniartarfinnut, napparsimaveqarfimmut, katersugaasivimmut, mittarfeqarfimmullu tikkuussisut ikkussuunneqarsimapput, siunertaavorlu kommunetta iluani illoqarfiit allat ilanngullugit Aasiaat assigalugu allagartalersorneqassasut.
Ilaatiguttaaq suliffeqarfik suleqatiserinnissimavoq kiisalu Qeqertalik nittarsaanneqarnissaanut suliaqarsimalluni, kommunetta iluani takornarissanik sullissisut ornigarneqarsinnaasullu nittarsaallugit, tamanna niueqatigiiffinni nunat tamalaat peqataaffigisaanni, isumasioqatigiinnernilu aallartitaqartarnikkut ingerlanneqartarsimalluni.
Piareersaatit qulaani taaneqartut pipput, takornarissat amerlanerusut immikkoortortaqarfitsinnut tikeraartalerumaarmata kiisalu tikinneqarnerusalernissaa suliniutingineqarmat.
Innuttaasunut iluaqutaasussaq
Qeqertalik Business Council kingumut ukioq 2022-mi aallarnisaasunut innuttaasunullu iluaqutaasunik pikkorissanernik, workshopinillu arlaleriaq aaqqissuussaqarsimavoq.
Inuussutissarsiutitigut siunnersuisoqarfiup piginnaanngorsaaneq periusissiaminni pingaarutilittut ingerlataraat. Taamaammallu ilaatigut innuttaasunut pikkorissaanerit assigiinngitsut ingerlattarsimavaat, assersuutigalungu ingerlatsinermut pilersaarusiorneq, missingersuusiorneq, aningaasaqarnikkut aqutsineq aammattaaq akileraartariaaseq, aallarnisaanermut iluaqutissiatut pikkorissaavigisarpaat. Sullissinermut kiffartuussinermut, nioqqutissanillu ingerlatsinermut ilinniartitsisoqarsimavoq. Aningaasaateqarfinnut tapiissutinik qinnuteqaasiornerit pillugit ilaatigut peqatigiiffinnut ilinniartitsisoqarsimavoq, workshoppimilu katersorneqarsimallutik, matumani peqatigiiffiit iluminni ingerlariusaat kiisalu peqatigiiffiit akimorlugit suleqatigiilluarnerulersinnaaneq siunertarineqarluni.
Ukiup siulianut sanilliullugu Inuussutissarsiutitigut Siunnersuisoqarfiup innuttaasunik illoqarfinni nunaqarfinnilu assigiinngitsuni siunnersuisarneri oqaloqatiginnittarnerilu amerleriarsimapput. Innuttaasut aallarnisaanissamik eqqarsaatersuuteqartut, periarfissaminnik, alloriaqqinnissamullu matumani siunnersorneqartarlutik.
Ataatsimeersuarneq 2022
Ileqquusumik ataatsimeersuarnermi Borgmesteri Kommunaldirektøri Kommune Qeqertalik piginnittuusoq sinnerlugu, taamatuttaaq ingerlatseqatigiiffiup siulersuisui pisortaaneralu ataatsimeersuarnermi peqataasimapput.
Ukioq 2022-mi naatsorsuutit qiviaraanni ingerlatseqatigiiffik 122.904 koruuninik sinneqartooruteqarpoq, ukiup siuliani 217.321-nik sinneqartooruteqarsimalluni. Erseqqissaatigineqartariaqarpoq sinneqartooruteqarnissaq matumani siunertaanngimmat, ingerlatseqatigiiffik sullissinermik isumaqatigiissut naapertorlugu kommuunemit aningaasaliiffigineqartarmat, isumaqatigiissutip imarisaasa piviusunngortinneqarnissaat siunertaralugu. Siunertarineqarporlu aningaasaliissutit amerlanerit kommunetta iluani inuussutissarsiornermut takornariaqarnermullu inerisaanermut atorneqassasut.
Ataatsimeersuarnermi kingumut Hanne Kristiansen, Anuni-mi piginnittoq, INUIT Quality Clothes Of Greenlandimilu pisortaaneq Siulersuisuni Siulittaasutut qiningaavoq. Kingumuttaaq siulersuisuni ilaasortani Hans-Jørgen Mørch, Julie Pars, Erne L. Olsen, Kristian Lyberth kiisalu Jakob Jensen qiningaaqqillutik, taamaattoq taaneqartoq kingulleq GE Qasigiannguit immikkoortortaqarfianit tunuassalluni aalajangersimavoq, taassumalu issiavia immikkoortortaqarfianniit allamik taarserneqartariaqalerluni.
Kommune Qeqertalimmit innersuutigineqarpoq taartaasussaq nutaaq sapinngisamik takornariaqarnermik ingerlatsisuussasoq, taamaasillunimi siulersuisut piginnaasaat tunuliaqutaallu siammasissumik assigiinngiisitaarnissaat anguneqassammat.
Siumungaaq ileqquusumik ataatsimeersuartitsinerni kukkunersiuisoq peqataatinniarneqartassaaq, taamaasillunilu naatsorsuutinik toqqaannaq saqqummiisinneqarsinnaasalissalluni.
Siulersuisut kissaatigaat siunissami ataatsimeersuarnerit nittartakkatigut malinnaavigineqarsinnaanngorlugit ingerlanneqartassasut, taamaasilluni innuttaasunut ammanerusumik isertuaaffiunngitsumillu ataatsimeersuarnerit ingerlanneqarsinnaalissammata.