Qeqertalik Business Councilip siulersuisui septemberip 8.-9. Aasianni Qasigiannguanilu isumasioqatigiipput.

Angalaarnermi sila pissutigalugu pilersaarutit allanngortinneqartariaqarsimapput, sammisassallu pilersaarutigineqartut ilaat taamaatiinnarneqartariaqarsimallutik. Taamaakkaluartoq ullut pitsaasumik imaqarluartumillu ingerlanneqarsinnaasimapput, siulersuisullu ataatsimiinnerisa saniatigut Qasigiannguani inuussutissarsiornermik takornariaqarnermillu ingerlataqartut ilai naapinneqarsinnaasimallutik.

Qasigiannguit Katersugaasiviani Nunaqarfik Uumassusilik pillugu saqqummiivigineqarpugut. Suliniutip aallartinnera, maannakkut killiffia kiisalu siunissami ineriartortinneqarnissaanut periarfissat pillugit oqaluttuunneqarpugut. Suliniut katersugaasiviup peqatigiiffiullu najukkamiittup suleqatigiinnerisigut ingerlanneqartarpoq, taamaalillunilu Qasigiannguani kulturikkut oqaluttuarisaanerput uummaarissumik takuneqarsinnaallunilu misigineqarsinnaalersinneqarluni.

Qasigiannguit Tourism & Charter Aasiannit Qasigiannguanut angallassisuullunilu Qasigiannguit eqqaani angalatitsivoq, ilaatigut Akulliit tikinneqarluni. Angalanerup iluani suliffeqarfiup suliniutai, maanna suliai siunissamullu pilersaarutai pillugit paasisaqarpugut.

Mikami Qasigiannguani tikeraarnitsinni sammisassanik ataqatigiissaarillunilu pulaagassatsinnik pilersaarusiorsimavoq. Aaqqissuussinerminni pulaartunut sassaalliutigisartakkamik ilaannik mamartunik misiliivugut, kiisalu Mikamip unnuisarfiisa ilaat takullugit siunissamut pilersaarutaat pillugit paasisaqarfigalugit.

Taamatut aaqqissuussineq aamma misilittagaqarfiulluarsimavoq. Najukkami ingerlatsisut suleqatigiillutik illoqarfimmut tikeraartunut immikkut pisariaqartitaannut naleqqussakkanik ullormut imaluunniit ullunut arlalinnut pilersaarutinik qanoq ineriartortitsisinnaanersut takussutissarsiffigaarput. Tamanna ilaatigut umiarsuarnik takornariartaatinik tikittartunut atorneqarsinnaavoq, taamaalilluni angallassineq, kulturi, nerisassat, unnuisarneq misigisassallu najukkamiittut ataatsimoortumik neqeroorutigineqarsinnaallutik.

Sammisassanut assigiinngitsunut angallannitsinni aamma Qasigiannguani nutaamik aallartittoq biilinik attartortitsisarfik Laaja atorsimavarput. Taanna aamma illoqarfimmi tikeraartunut sullissinermut periarfissanik nutaanik pilersitseqataavoq.

Isumasioqatigiinnermi siulersuisut ataatsimiinnerisa saniatigut pingaaruteqarsimavoq najukkami ingerlatsisut naapinnissaat, suliniutaat takunissaat aammalu periarfissat unammilligassallu namminneq oqaluttuaritillugit tusarnissaat.

Maanna ilisimalikkavut misilittakkavullu tunngavigalugit ingerlaqqissaagut. Najukkami ingerlatsisut akornanni suleqatigiinnerup suli nukittorsarnissaa, misigisassanik neqeroorutinillu nutaanik ineriartortitsinissaq kiisalu Qasigiannguit Qeqertaliullu sinnerani takornariat amerlanerusut misigisaqartarnissaat Qeqertalik Business Councilimit Destination Diskobayimillu sulissutigissavarput.

Ilaatigut ingerlatsisut suleqatigalugit tikeraartunut, matumani umiarsuarnik takornariartaatinik tikittartunut, ataatsimoortumik aaqqissuussanik ineriartortitsinissamut periarfissat malitseqartissavagut.

Taamaaliornikkut takornariaqarnerup najukkami suliffeqarfinnut amerlanerusunut iluaqutaanissaa, sammisassanik amerlanerusunik pilersitsinissaa aammalu isertitaqarnerulernissamut tunngavissiisinnaanissaa anguniarneqarpoq.

Tikilluaqqusisunut, angallassisunut pilersaarutillu allanngoraluartut iluatsinnissaannut peqataasunut tamanut qujanaq. Maanna isumassarsiat periarfissallu tikeraarnitsinni pissarsiarisavut malitseqartinnissaat sulissutiginiassavagut.