Aasaanerani Qeqertalik Business Councilimi ulapputtoqartarpoq. Inuussutissarsiornermik takornariaqarnermillu ineriartortitsineq pillugu ulluinnarni suliat ingerlaannarnissaat saniatigut aasaanerani piffissaq atorneqartarpoq nuna tamakkerlugu politikkikkut aalajangiisartunut kiisalu najukkani innuttaasunut oqaloqateqarnerup suleqatigiinnerullu nukittorsarneqarnissaannut.
Kingullermik Naalakkersuisut Siulittaasuat Jens-Frederik Nielsen aamma Naalakkersuisoq Jørgen Rosbach Aasianni allaffeqarfitsinnut tikilluaqquagut. Tamatuma saniatigut Inatsisartunut ilaasortaq Naaja Nathanielsen ataatsimeeqatigaarput qarasaasiakkut.
Ataatsimiinnerni siunertaavoq Qeqertalik Business Councilip aaqqissugaanera, periusissiaa kiisalu Kommune Qeqertalimmi inuussutissarsiornermik takornariaqarnermillu ineriartortitsinermut suliarisartagai pillugit saqqummiussinissaq, kiisalu siunissami suleqatigiinnissamut periarfissat oqaloqatigiissutigalugit.
Naalakkersuisut tikeraarneranni suliffeqarfiup aaqqissugaanera, siulersuisui, periusissiai aammalu inuussutissarsiortunut sullissineq, aallarnisaasunik siunnersuineq, piginnaasanik ineriartortitsineq takornariaqarnermillu ineriartortitsineq pillugit saqqummiussivugut. Tamatuma saniatigut kommunimi tamarmi suliniutit ingerlasut kiisalu 2027 naanissaata tungaanut anguniakkagut takorluukkavullu saqqummiunneqarput.
Suliniutit aalajangersimasut aamma immikkut sammineqarput. Ilaatigut takornariaqarnermi mikroinfrastrukturimik ineriartortitsineq, Aasianni Qeqertarsuarmilu misigisassanik nutaanik pilersitsineq, FoodLab, Innovationscenter, takornarianut sullississutit pitsanngorsarnissaat kiisalu nunap immikkoortuani eqqissisimatitassaq (Nationalpark) pillugu sulineq aammalu siunissamut ungasinnerusumut suliniutit pingaarnerit saqqummiunneqarput.
Tikeraarneq pitsaasumik ammasumillu oqaloqatigiinnertut ingerlanneqarpoq. Naalakkersuisut Qeqertalik Business Councilip ukiuni kingullerni angusai nersualaarpaat, kiisalu erseqqissarlugu suliffeqarfiup aningaasatigut killilimmik periarfissaqaraluarluni angusaqarfiulluartumik suliaqarnera maluginiarnartoq. Aammattaaq inuussutissarsiortunngorniartunut siunnersuineq, pingaartumik aningaasaqarnikkut siunnersuineq, suliffeqarfinnik nutaanik pilersitsinissamut pingaaruteqartoq immikkut erseqqissaatigineqarpoq.
Peqatigisaanik inuussutissarsiortunngorniarneq oqinnerulersinneqarnissaa kiisalu inuussutissarsiornermut atugassarititaasut pitsanngorsarneqarnissaat pillugit eqqartuisoqarpoq. Takornariaqarnerup ineriartortinneqarnera, umiarsuarnit takornariartitsineq, unnuisarfiit, neriniartarfiit, Airbnb kiisalu takornarianut pisariaqartinneqartut pillugit aamma pitsaasumik oqaloqatigiittoqarpoq.
Kingornatigut Inatsisartunut ilaasortaq Naaja Nathanielsen ataatsimeeqatigaarput qarasaasiakkut. Tassanissaaq suliffeqarfiup aaqqissugaanera, periusissiaa aammalu suliarisartakkavut saqqummiuppagut. Ilaatigut kommunalbestyrelsimut siunnersuutigut, ineriartortitsinissamut pilersaarutigut kiisalu Kommune Qeqertalimmi siunissamut ungasinnerusumut ineriartornermik pilersitsisinnaasutut isigineqartut suliniutit pingaarnerit saqqummiunneqarput.
Ataatsimiinneq aamma periarfissiivoq aningaasalersuinissamut periarfissat kiisalu suleqatigisinnaasat pillugit pitsaasumik oqaloqatigiinnissamut. Naaja Nathanielsen Inatsisartunut ilaasortatut aammalu siornatigut Naalakkersuisuusimanermini misilittakkani tunngavigalugit aningaasaateqarfiit, tapiissuteqartarfiit kiisalu ineriartortitsinermut periarfissat pillugit ilisimasaminik avitseqatigaatigut. Ilisimasaasa taakku suliniutitsinnut maanna ingerlanneqartunut siunissamilu aallartinneqartussanut iluaqutaasinnaapput.
Qeqertalik Business Councilimut nuna tamakkerlugu politikerinik oqaloqateqarneq pingaaruteqartorujussuuvoq. Taamaaliornikkut Kommune Qeqertalimmi pisariaqartitat periarfissallu takutinneqarsinnaapput, kiisalu najukkami ineriartortitsinissamut suliniutit nunami tamarmi suliniutinut kiisalu aningaasalersuinissamut periarfissanut attuumassuteqartinneqarlutik.
Peqatigisaanik aasaanerani suliat kommunimi ingerlaqqissapput. Ulluni tulliuttuni nunaqarfiit tikinngisatta sinneri tikeraassavagut, innuttaasut, inuussutissarsiortut najukkanilu suleqatit naapinniarlugit. Siunertaavoq najukkani isumassarsiat pisariaqartitallu tusarniarlugit aammalu Kommune Qeqertalimmi ineriartortitsineq innuttaasunik qanittumik suleqateqarluni ingerlaannarnissaa qulakkeerniarlugu.
Upperaarput najukkani nuna tamakkerlugulu oqaloqatigiinneq suleqatigiinnerlu Kommune Qeqertalimmi inuussutissarsiornermik takornariaqarnermillu piujuartitsisumik ineriartortitsinissamut tunngavigisassanik pingaaruteqartuusut.
