Ukiumoortumik angalanermut takornariaqarnermullu saqqummersitsineq Vestnorden Travelmart ukioq manna Nuummi 21.-22. september 2026 ingerlanneqassaaq, tassanilu Kalaallit Nunaanneersut, Islandimeersut Savalimmiuneersullu takornariaqarnermik suliaqartut nunarsuarmit tamarmeersut angalatitsivinnik suleqatissanillu naapitaqassapput.
Destination Diskobay ukioq mannattaaq saqqummersitsinermi peqataassaaq, tamatumuuna pisortaaneq Gerth P. Olsen aamma Destination Managerertaarput Ane J. Siegstad peqataassallutik. Saqqummersitsinerup nalaani nunarsuarmi sumiiffinnit assigiinngitsuneersunik minnerpaamik angalatitsivinnik 32-nik naapitsinissatsinnut piffissaliussanik isumaqatigiissuteqarpugut, taakkununngalu Qeqertarsuup Tunuani periarfissat misigisassallu saqqummiutissallugit.
Vestnorden Travelmartimi peqataanerput Destination Diskobayip FAM Tripimik aaqqissuussinerata kingorna pissaaq. Tassani nunani tamalaaneersunik angalatitsivinneersunik 10-nik Qeqertarsuup Tunuani tikeraartoqarsimavoq. Tikeraarnerminni Qeqertalik nammineq misigisaqarfigisimavaat, najukkami inuussutissarsiutinik ingerlataqartut naapissimallugit aammalu nunani tamalaani takornarianut neqeroorutigisinnaasagut pillugit sukumiinerusumik paasisaqarsimallutik.
Peqataasut utertitsillutik oqaaseqaataat pitsaasorujussuupput, angalatitsivinneersullu angalanerminni misigisaminnik assigiinngitsorpassuarnik nuannarinnillutillu tupaallaatiginnissimapput.
“Angalatitsivinneersut Qeqertarsuup Tunua ataatsimiinnermi oqaluttuarineqarnera kisiat tusarnagu namminneq tikeraarlutik misigisaqarfigigaangamikku tamanna annertuumik allaanerussuteqartarpoq. Maanna toqqaannartumik Vestnorden Travelmartimut ingerlaqqissaagut, tassanilu soqutiginninneq tamanna nangillugu ineriartortissavarput, peqatigisaanillu Qeqertarsuup Tunua nunani tamalaaneersunut minnerpaamik angalatitsivinnut 32-nut allanut saqqummiutissallugu,” Gerth P. Olsen oqarpoq.
FAM Tripimut atatillugu Destination Diskobayip aamma najukkami takornarialerisunut, akunnittarfinnut, neriniartarfinnut kiisalu suleqatitsinnut tamanut tikeraarnerup iluatsilluarnissaanut peqataasimasunut qujassuteqarfigerusuppai. Peqataalluarnissarsi, tikeraartitsilluarnissarsi tapersersuinersilu pingaaruteqarluinnarsimapput, ataatsimoorluta nunap immikkoortuata nunanit tamalaanit tikeraartunut iluatsittumik saqqummiussinnaaneranut.
Vestnorden Travelmart Destination Diskobayip nunani tamalaani attaveqaatinik nutaanik pilersitsinissamut aammalu nunap immikkoortuani takornariaqarnermut nioqqutissanik amerlanerusunik niuerfinnut anngussinissamut siumungaaq anguniagaqarneranut pingaaruteqartuuvoq.
Peqatigisaanik Kalaallit Nunaannut soqutiginninnerup annertusiartornerata Aasiaat, Qasigiannguit, Qeqertarsuaq, Kangaatsiaq kiisalu Qeqertarsuup Tunuata sinneranut iluaqutaanissaa anguniarlugu sulivugut.
Anguniagarput takornariat amerlanerulernissaat kisiat pinnagu, nunap immikkoortuani suleqatigiinnerup nukittorsarnissaa aammalu nunani tamalaani angalatitsiviit sullitaminnut Qeqertarsuup Tunuani amerlanerusunik misigisaqarnissamut pitsaasunik periarfissaqartitsinissaat anguniarparput.
