Sapaatip akunnerani kingullermi kommuneqarfiit arfarleriiusut Avannaata kiisalu Qeqertalik  Ilulissani, Qeqertarsuup Tunua akimorlugu allilertuinissamut nioqqutissanillu inerisaanissamut tunngatillugu eqqartueqatigiipput. Isumasioqatigiinnermi suleqatigiissinnaanermut ilippanartut arlallit nutaat saqqummiunneqarput. 

Sapaatip akunnerani kingullermi Avannaata Kommuniani Inuussutissarsiuteqarnermut Aqutsisoqarfiup, Qeqertarsuup Tunuani Avannaanilu inuussutissarsiuteqartut tamarmik isumasioqatigiinnissamut aggersarsimavai. Qeqertalik Business Council ilaatigut Qeqertalimmiit inuussutissarsiuteqartut sinnerlugit peqataatitsivoq. Isumasioqatigiinnermilu ilaatigut kommuneqarfitta iluani alliliinissamut siuarsaanissamullu pilersaarutit saqqummiunneqarlutik, soorlu akunnittarfiit assigiinngitsut alliliinissaannut pilersaarutaat, kiisalu Qeqertalik Centerimik pilersitserusunneq saqqummiunneqartut ilagaat. 

Ilasseqatigiinneq periarfissallu nutaat 

Isumasioqatigiinnerup ulluini marlussunni ingerlanneqartumi inuussutissasiuteqartut takornariartitsisartullu assigiinngitsut akornanni saqqummiisut arlaqarput. Ilaatigut Majoriamiit suliffeqarneq alliliinerlu pillugu saqqummiussisoqarpoq, Visit Greenlandip pisortaanerisimasaa Islandimi takornariaqarneq pillugu isumassaarsiivoq, kiisalu namminersorlutik inuussutissarsiuteqartut arlallit nammineerlutik aallarnisarsimanertik pillugu aallarnisaasunut allanut isumassarsiissutinik tunniussaqarput. Naggataatigullu Innovation Greenland aamma Greenland Venture najuullutik tapiissutinik kiisalu aningaasaleeqataasinnaanermut periarfissanik neqerooruteqarsinnaanertik pillugu saqqummiipput. 

Annerusumik suleqatigiilerneq 

“Inuussutissarsiutitigut Siunnersuisoqarfittut peqataanitsinni Avannaata kommunianiit inuussutissarsiutillit arlallit naapinneri pissarsiaqaateqarfigilluarparput. Taamaakkaluartorli isumasioqatigiinnermi illoqarfitsinniit inuussutissarsiutillit amerlanerit peqataasinnaaneri neriuutingisimangaluarlutigu, peqataanitsinni pissarsiagut iluarisimaarpagut.” Taama oqarpoq Gerth P. Olsen, Qeqertalik Business Councilimi pisortaaneq. Ilaatigut immikkut tikkuarumavaa, nunatsinni eqimattakkaarluni soqutigisaqatigiillunilu suleqatigiissinnaanerup periarfissaqarnerata eqqartorneqallaalernera. 

Naggataatigullu isumasiuinerup qaavatigut Avannaata Kommunianit Inuussutissarsiornermi Aqutsisoqarfiup kiisalu uatsinni Inuussutissarsiutitigut Siunnersuisoqarfitta, ukiuni tulliuttuni illugiilluta suleqatigiinnerulernissatsinnut qilanaaruteqarluta oqaasinngueqatigiippugut.