Qeqertalik Business Council aamma Destination Diskobayip siulersuisui ukiumoortumik sammisassalimmik ataatsimiinnerat sisamanngornermi septembarip 5-ani Qeqertarsuarmi ingerlanneqarpoq, tassa kommuneqarfiup illoqarfiisa sisamaasut ilaat. Sammisassaqarluni ataatsimiinneq paarlakaattumik illoqarfiit akornanni ingerlanneqartartoq, takornariaqarnermi kiisalu inuussutissarsiornermi angusaqarfiusunut misigisassarsiornernillu imaqartinneqarluni ingerlanneqarpoq.

Sumiiffimmi inuussutissarsiornermi ingerlatsisut naapinnerat

Ulloqeqqata tungaanut siulersuisut ataatsimiipput, kingornalu ualikkut illoqarfimmi inuussutissarsiuteqartut naapinnerannik ilaqarluni:

• Kuannit Artwork Qeqertarsuaq: Kirsten S. Pedersenip ukiuni arfinilinni kingullerni tammajuittussanik tunisassiorluni, sumiiffik qitiutillugu eqqumiitsuliornermik kiisalu misigisassarsiornermik pingaartitsilluni, pisiniarfinnguamik ineriartortitsilluni iluatsilluartumik ingerlatsisimavoq. Kirstenimut pulaarnermi takornariartitsineq kiisalu illoqarfimmi piujuartitsinermik ineriartortitsinissaq oqaluttuaralugulu takutissorpaa. Siulersuisut pulaarnerminni, Kirstenip nammineerluni naasunik pinngortitamit katersisorsimasaanik, tiitortinneqarlutik najoqqaasinnerput.
• Nukariit Qeqertarsuaq ApS: Anders, qatanngutigiit mekanikeritut suliffeqarfimmik ingerlatsisut aappaata, suliffeqarfiup ilisaritinnera siunissamullu pilersaarutitik pillugit saqqummiivoq. Qeqertalik Business Council pilersitsilerneranni aallartisarnermilu siunnersuilluni ikiuussimavoq, taamaattumik suliffeqarfiup suli ineriartornera ulapputeqarneralu tulluusimaarutigineqarluni.
• Beach Igloo Lodge & Qeqertarsuaq Boat Tours: Lillian, piginnittoq Kasper Broberg sinnerlugu tikilluaqqusivoq kiisalu suliffeqarfiup ingerlatai saqqummiullugit, ilaatigut imaatigut sumiiffiup qanittuani sinerissamilu angallassinerit ingerlattarpai, kiisalu sissami igloonik isikkivigilluinnartunik unnuisarfiuteqarluni.
• Disko Adventures I/S: Naja, Danny aamma Steve peqatigalugit Disko Adventuresimik ingerlatsisuuvoq, taakkulu tikeraat nunaminni takornariartittarpaat, qimussiussillutik angallassisarput, qimmiminnik nerukkaallutik kiisalu kulturiminnik saqqummiussisarput. Suliffeqarfiutaat nutaajungaluartoq, ilisarisimaneqarlualeraluttuinnarluni annertusiartorpoq.

Qeqertarsuarmi misigisassat

Inuussutissarsiuteqartut naapinnerisa saniatigut, siulersuisut aamma illoqarfiup pisiniarfiinnuttaaq alakkaallattaapput, soorlu Pilersuisoq aamma Kajuinna aamma Cafe Bellamut iserpaat. Illoqarfimmiinnerminni Hotel Disko Islandimi akunnissimaarput, ilaatigut hotelip sissami saunartarfia misilinneqarluni, sapiitsullu Qeqertarsuup Tunuata imartaani sikorasaartumi kinillutik. Hotelip neriniartarfiani nunatta tunniussassai mamarluinnartut sassaalliutigineqarlutik misilerarneqarputtaaq.

Siulersuisup siulittaasuata oqaasii

“Sumiiffimmi inuussutissarsiuteqartut qanimut naapilluarnerat kiisalu suliaannik saqqummiivigineqarput isummersorfiullunilu nuannaarutigaara,” taama oqarpoq Hanne Kristiansen, Qeqertalik Business Council aamma Destination Diskobayip Siulittaasua, nangillunilu: “Illoqarfiup takornarissanut tunniussinnaasaannik inuussutissarsiutitigullu neqeroorutaannik paasisaqarluarpugut, tamakkulu tamarmik inuiaqatigiinnik nukittorsaataaqataalluarumaarput.”

Siulersuisut pillugit

Siulersuisoqatigiit ukuupput:

Hanne Kristiansen, Siulittaasoq

Julia Pars, Siulittaasup tullia

Hans Jørgen Mørch, Ilaasortaq

Kristian Lyberth, GE Qeqertarsuaq

Søren Hansen, GE Aasiaat/Kangaatsiaq

Hans Aqqalu Lyberth Didriksen, GE Qasigiannguit