Ukioq manna Adventure Travel World Summit™ naalisarneqarsimasoq (ATWS) sapaatip akunnera kingullermi Hokkaido, Japanimi ingerlanneqarpoq. Takornarialerinermi Aqutsisoq Navarana Bidstrup, Destination Diskobayimiit peqataatinneqarpoq Qeqertalimmilu immikkoortortaqarfik avammut nittarsaallugu. Kalaallit Nunaanniit takornarialerinermi siuarsaaqataasut arfineq pingasut allat peqatingalugit Kangianut angalaqatigiipput.
Aaqqissuussaq nunarsuaq tamakkerlugu sumiiffinni assigiinngitsuniit peqataasut 800-t akornanni takornarialerisut, angalanermut tunngasunik allaaserinnittartut aammalu Influencerit (sunniiniarlutik angalasartut) nunarsuarmi malinnaaffigineqarluartunit peqataaffigineqarpoq.
Naapinnermi uani anguniarneqarpoq angallaviit nutaat soqutiginartut, attaveqaatit nutaat, nutaaliornermilu suliffeqarfittut iluarsiissutit takornariaqarnerup *Adventure iluani sammineqarnissaat.
Naapeqatigiinnerit saniatigut Adventuremik takornariaqarnerup iluani paasisaqarnarluinnartut allat eqqartorneqarputtaaq.
Sammineqartut pingaarnerit ilagaat takornarissat Kangiamiut Adventuremik soqutigisallit amerliartormata, taakkulu soqutigilluinnaraat piujuaannartitsineq. Aammattaaq eqqartorneqarpoq takornariaqarnermik piorsaasinnaasunut tamanna takornarissanut tulluartumik sumiiffinnilu takornariarfiusuni qanoq suliunitigineqarsinnaanera. Sammineqartut soqutiginartut allat ilagaat pinngortitamik piujuaannartitsineq anguniarneqarnissaa. Tassani eqqaaneqarpoq pinngortitami ataqatigiinneq uumasullu sumiiffimminni nammineq uumanissaat, nalingiissumik Adventuremik takornariaqarneq aammalu pingortitamik illersuinissaq anguniarlugu. Piffissami uani tamanna sumiiffitsinnut Qeqertalimmut tulluarluinnartuuvoq, tassami Kommune Qeqertaliup Nassuttooq nuna, nuna allanngutsaalisanngornissaa anguniarlugu suliniutigileruttormagu.
‘’Nuannaarutigaara periarfissinneqarsimagama ATWS-mut peqataanissannut, tassani immikkoortortaqarfipput Qeqertalik aammalu takornarialerisuvut nittarsaappakka. Immikkoortortaqarfipput takornarissanut Adventuremik soqutigisalinnut tulluarluinnartuuvoq, takusassat soqutiginarluinnartut sumiiffitsinni utaqqiinnartut amerlalluinnarmata. Tulluusimaarutigaara Qeqertalik angalanissamik aaqqissuussisartunut, tusagassialerisunut aammalu takornarissanut sunniiniartartunut aaqqissuussami ATWS-mi avammut nittarsaassinnaagakku.’’ Takornarialerinermi Aqutsisoq, Navarana Bidstrup oqarpoq.
Naapeqatigiinnerit amerlasuut ilaanni aamma periarfissaqarsimavoq nunarsuarmi assigiinngitsuni takornariaqarnermik aqutsisut allat peqatigalugit, unamminartut suut kiisalu angusat pitsaasut sorliunersut eqqartueqatiginissaannut. ATWS periarfissamik pitsaalluinnartumik tunisivoq, avammut nittarsaassineq attaveqaqatigiilernermillu Adventuremik soqutingisalinnut pilersitsilluni. Nunarsuaq tamakkerlugu angalasut piujuaannartitsinermik soqutigisaqarnerat qaffakkiartuinnavippoq aamma pingaartikkaluttuinnarlugu unnuisarfiit piujuaannartitsinermik eqqarsaateqassasut, soorlu sumiiffitsinni tamanna aamma pikkoriffiginerulertariaqaleripput!
*Adventure oqaaseq imartusinnaagaluartoq naatsunngorlugu nassuiaat: Timi atorlugu takornariarneq, piorsarsimassutsimik paarlaasseqatigiinneq aammalu pinngortitami takornariarneq.