Nittartagaq nutaaq Qeqertarsuup Tunuaniit assinik oqaluttuanillu saqqummersitsisarnermigut, takornariaqartitsinermi inuiaqatigiinnut inuussutissarsiortunullu iluaqutaasussanngorsinnaavoq. Nittartagaq avammut nittarsaataassaaq immikkoortortaqarfitsinnilu takornarissanut inuussutissarsiuteqartunullu akunnermiliuttuutaassalluni.
Destination Diskobay, Kommune Qeqertaliup takornariaqarnermik suliffeqarfiutaa Qeqertarsuup Tunuani takornariaqarnermik piujuaannartussamik siuarsaaqataasoq nittartagartaarpoq, tassaavorlu www.diskobay.gl. Nittartagaq Qeqertarsuup Tunuata takornariaqarfittut nunarsuup sinneranit ilisimaneqarlualernissaa siunertaralugu tuluttut nittarsaanneqarpoq.
Kommunip illoqarfiisa taakkualu nunaqarfiisa oqaluttuatigut assitigullu avammut nittarsaanneqarnerisigut takornarissanik qammaaniartassapput, tassuunalu soqutiginnittut sumiiffinni periarfissat, unnuisarfiit, misigisassarsiorfiit assigisaalu nassaarineqartarumaarlutik. Taamaasiornikkullu sumiiffinni inuussutissarsiutillit takornarissallu akunnerminni attaveqaqatigiissinnaalersinneqassallutik.
Sumiiffitsinniit assit immersueqataassapput
Nittartagartaarput takornarissanit, immikkoortortaqarfitta inuussutissarsiuteqartuisa neqeroorutaannut periarfissarpassualinnut isaariarineqartussatut naatsorsuutaavoq. Assillu saqqummiunneqartartussat ilaatigut Visit Greenlandimiit, innuttaasunik inuussutissarsiuteqartunillu assilisaasarumaarput, taamaasiornikkullu immikkoortortaqarfitsinniit assilisat takornariarusuttunut tikeraarusuttunullu isummersueqataasarumaarlutik.
Nittartagaq maana isernikkut qimerlooruk avammullu attaveqaatissinnut nassiussuinikkut nittarsaaqataallusi: www.diskobay.gl.