Qeqertalik nittarsaanneqaqattaartoq
Inuussutissarsioqarnikkut takornariaqarnerikkullu inerisaanermut aaqqissuussisoqarfiup pisussaaffiisa ilagaat Qeqertalik suleqatigilersinnaasatsinnik soqutigisaqaqatigiinnullu avammut nittarsaatissallugu.
Sapaatip akunnera kingulleq aaqqissuussanut assigiinngitsunut pingasunut, nunani allani marlunni peqataavugut, tamannalu Destination Diskobayimiit sulisut marluullutik immikkut angalanerannik anguneqarpoq aaqqissuussat ullui imminnut nipitartuunneri peqqutigalugu.
AECOs Annual Meeting 2023
Aaqqissuussat ilaat peqataaffigisarput tassaavoq AECO ukiumoortumik katerisitsinera, tamannalu Oslo-mi ingerlanneqarpoq. Tamannalu aaqqissuunneqarpoq alaatsinaallutik issittumi umiarsuaatileqatigiinnit, ukioq manna ukiuni 20-nngortorsiortoq. Matumani aaqqissuussami Destination Manager Navarana Bidstrup peqataatinneqarpoq, Qeqertalik takornariaqarfittut peqataasunut nittarsaakkiartorlugu.
”Kattuffissuup ilaasortanik 16-ninik ’speeddatingimik’ taallugu ataatsimeeqateqarpunga, taakkuuppullu immikkoortortaqarfitsinnik kiisalu takornariaqarnikkut ingerlatsisugut pillugit paasisaqarluarusuttut. Ilaatigut ilaasortat siunissami umiarsuaatiminnut tunngasunik pilersaarutiminnik saqqummiipput. Unali uanni pingaarnertut angusatut oqaatigerusussinnaasara tassaavoq, suleqatigilersinnaasatsinnik, siunissamilu suleqatissatsinnik toqqaannartumik oqaloqatiginnikkatta, attaveqarlutalu” Taama oqarpoq Destination Diskobay-mi aqutsisoq Navarana Bidstrup.
Qanimut attaveqaqatigiilernerup kingunerissavaa, siunissami umiarsuit takornariartaassuit immikkoortortaqarfitsinnut tikittarnissaannut siumoortumik isumaqatigiissusiorfigisinnaanissaannut periarfissagissaarnerulernissaa. Taamaasillutalu immikkoortortaqarfitsinnut tikeraarneranni susoqartitsinissamik piareersaalluarsinnaallutalu aaqqissuussisinnaalertussaalluta.
VestNorden Travelmart 2023
Oslomisuttaaq aaqqissuussami taamatut Reykjavíkkimi ulapittoqarpoq, angallannermut niuernersuarmut aaqqissuussamut Vestnorden Travelmartimik taaneqartumut peqataanermi. Matumani aaqqissuussamut Destination Diskobayimi pisortaq Gerth P. Olsen, Kalaallit Nunaanniit aallartitanut 42-sunut ilaalluni peqataatinneqarpoq, nunatsinni nunat immikkoortui takornariarfigineqarsinnaasut nittarsaallugit, nunat tamalaat takornarialerinikkut suliaqartut peqataaffigisaanni.
Niuernersuarmik aaqqissuussap sapaatip akunnera sioqqullugu, angalatitsinermik aaqqissuisartut Qeqertalik tikeraarpaat, ullualunnilu Aasianni Hotel Sømami unnuisimapput, aput nutaaq namminneerlutik misigisinnaasimallugu silaannarissuarmilu Aasiaat illoqarfiani timaanilu pisuttuarsimallutik. Taamatuttaaq neriniartarfimmi nutaajusumi Northstarimi neriniarsimallutik, Qeqertarsuarmut Diskoline aqqutigalungu aallartigatik.
Qeqertarsuarmut tikeraarnerminni Qeqertarsuarmiunik inuusuttunik takornariaqarnikkut angallassassisartunik pitsaalluinnartumik sullinneqarsimapput, qaqqarsuit kusanaqisut aperlaallu ataanni, taamatuttaaq qimmiminnut alakkaasitsillutik misigisaqartitaasimallutik, tamannalu angalanermik aaqqissuussisartoqatigiinnut assut nuannaarutaasimalluni. Taaneqareersut saniatigut tammajuitsussarsiniartarfik Kuannit Art aqqusaarsimavaat, piginnittoq matumani tikeraanut oqalugiartinneqarsimalluni.
“Angalanermut aaqqissuisartut nunani tamalaaneersut 17-nit Reykjavíkkimiinninni ataatsimeeqatigaakka, tamarmik immikkut assigiinngissusilinnik sullitaqarlutillu soqutigisaqartut. Immikkoortortaqarfipput takornariaqarnikkut qanoq misigisassarsiorfigisinnaanera tusarniassallungu assut soqutigaat, sullitaminnullu Qeqertalik tulluarsorisinnaallugu. Ilaatigullu Hotel Søma aamma isumaqatigiissusiorsimalluni Aasiannut angerlaassaqarluni” taama oqarpoq Destination Diskobayimi pisortaq Gerth P. Olsen.
Pisut akornanni nersornaat Greenland Tourism Award 2023 saqqummiunneqarportaaq, ilaatigut Qasigiannguaniit Mikami Hostels nersorneqarnissamut innersuunneqarsimasut ilagaat.
Arctic Circle Assembly 2023
Inuussutissarsiutitigut Siunnersuisoqatigiit pisortaanera Arctic Circle Assemblymut Reykjavíkkimut angalanermini iluatsillugu malitsigiinnarlugu peqataavoq. Aaqqissuussaq annertooq ulluni pingasuni ingerlanneqarpoq, oqallinnerillu 200-ni inuit oqalugiartut 700-llutik, oqalugiaatigineqartumullu apeqqutissaqaraanni, ilassutissaqaraanniluunniit peqataaffigineqarsinnaasumik. Taamaattoq Issittormioqatigiit iluanni politikki, niuerneq kiisalu takornariaqarneq, issittumilu ilisimatusarneq aaqqissuussami qitiutinneqarpoq.
Aaqqissuussami inuussutissarsiorneq pillugu aningaasaliisartunik, politikkerinillu qanimut oqaloqatiginninnissamut, attaveqaatinillu avitseqatigiinnissamut, kiisalu suliavut soqutigisavullu pillugit oqaloqatiginninnissaq periarfissaalluarpoq.
Soqutiginarluinnartut ilaat tassaavoq Ilisimatusarnermut Siunnersuisoqatigiit (Forskningsrådet) Ileqqussaasut pillugit saqqummiinerat, Kalaallit Nunatsinni ilisimatusarnikkut ileqqussat sinaakkutassiornissaanut tunngatillugu saqqummiisut. Siunissamilu aggersumi tikeraarumaartussat. Taamatuttaaq aamma oqalugiarnerit ilaanni sammineqarpoq amerikkarmiut kalaallillu suleqatigiillutik takornariaqarnikkut, sullinnikkut aalisarnikkullu ilinniagaqarnermik nukitsorsarnissaat Campus Kujalleq / Imarsiornermik Ilinniarfik / Pinngortitaleriffik amerikkarmiullu ilinniagaqarnermut aaqqissuussisoqarfii allat suleqatigalugit.
