Namminersortut Mads Henrik Jakobsen aamma Lis K. Sandgreen ilisaritillugit ✂️
Qeqertalik Business Councilimi nuannaarutigaarput Aasianni namminersortut marluk, Mads Henrik Jakobsen aamma Lis K. Sandgreen, ilisaritissinnaagatsigit.
Taakku marluullutik nujalerisutut namminersorlutik ingerlatsipput, siunissamilu ataatsimut piginnittooqatigiilernissartik anguniarlugu sulillutik.
Mads Henrik aamma Lis siunnersorneqariarlutik namminersorlutik ingerlatsinertik ineriartortinniarlugu ataatsimoorlutik suliniuteqalerput. Maannakkut angerlarsimaffimminni nujaajaasarput, namminerlu lokalitaarnissartik anguniagaasa pingaarnerit ilagaat.
Mads Henrik nujalerisutut ilinniarsimasuunngilaq, soqutigisanili aallaavigalugu ukiuni arlalinni nujaajaasarsimavoq. Siullermik ikinngutini nujaajartarlugit aallartippoq, piffissallu ingerlanerani piginnaasani ineriartortissimallugit. Maannakkut sullittakkaminik amerliartuinnartunik nujaajaasarpoq.
Lis 2015-imi nujalerisutut ilinniakkaminik naammassivoq, tamatuma kingorna Aasianni nujaleriffimmi atorfeqarsimalluni. Maanna Mads Henrik peqatigalugu namminersortutut ingerlalerpoq, marluullutillu siunissami suliffeqarfimmik ataatsimoorussamik ineriartortitsinissaq anguniarlugu.
Mads Henrik aamma Lis utoqqarnut ornigullutik pisinnaannginnerusunut kiisalu najugaqatigiiffinni najugaqartut ornillugit nujaajaasinnaasarput. Sullittakkatik sapinngisartik tamaat sullinnissaat pingaartitaraat, pisariaqartitsisullu ornillugit sullissisinnaasarlutik nuannaarutigalugu.
Takorluugaasa ilagaat siunissami namminneq nujaleriffeqalernissartik, tamannalu anguniarlugu maannakkut suliniuteqarput.
Lis aamma Mads Henrik Qeqertalik Business Council pillugu imak oqaaseqarput:
” Naattumik oqaatingalungu saaffingiuminartuuvusi, ikiuukkusuttut siunnersuilluartartullu. Namminersortunut tapersersuerusuttusi malunnaq ersarik”
Qeqertalik Business Councilip Inuussutissarsiutitigut Siunnersuisoqarfik, suleqatigissallugu isumaqatigiissusiorfiginikuuaa, Nalik ventures suleqatigalugu inuussutissarsiornikkut ineriartortitsinermut ingerlatsiviupput, Nalik ventures ilaatigut aningaasanik atukkiisartuullutik nioqqutinilluunniit ineriartortitsisoqarniartillugu tapiisartut.
Illittaaq namminersulerniarlutit aallartissassaguit imaluunniit suliffeqarfiit ineriartortinnissaanut siunnersorneqarnissamik pisariaqartitsiguit, Qeqertalik Business Council attavigisinnaavat. Qeqertalik tamakkerlugu illoqarfinni nunaqarfinnilu siunnersorneqarnissamik inniminniisinnaavutit, oqarasuaatikkut imaluunniit e-mailikkut attaveqarlutit.