Sapaatip akunnera kingulleq Qeqertarsuarmi tunngaviusumik piujuaannartitsineq pillugu pikkorissaasoqqarlunilu takornariaqarnermut tunngasunik sammisaqartoqarpoq.
Tunngaviusumik piujuaannartitinermi pikkorissarnermi peqataasut piujuaannartitsinermi taajuutit assigiinngitsut kiisalu FN-p anguniagai 17-t sammisimavaat, taamaasillutik suliffeqarfiit qanoq piujuaannartitsineq suliffeqarfimmut atassusertarneraat paasisaqarfingalugu, siunissamullu nammineq sakkussaminnik paasisaqarlutik.
Kommunemiit, Arktisk Stationimiit aamma namminersortut Disko Adventures-imiik, Kuannit Art-imiillu peqataasoqarpoq, pikkorissarnerminnilu assut peqataalluarlutillu oqalilluarput.
Takornariaqarnermut tunngasunik sammisaqartitsinitsinni innuttaasunut tamanut ammasumik aggersaanikuuvugut, tassani sammisaqartitsillutalu eqqartueqatigiippugut.
- Ilaatigut nunap immikkoortuini agguataarinissamut tunngasut,
- innuttaasut takornarissanut maleruaqqusatut inassutaannik sanasoqassasoq eqqartorneqarpoq
- ullorlu kingulleq qanoq allaanerusumik takornarissanut tunisassiortoqarsinnaanersoq saqqummiisoqarpoq oqallinnertaqarluartumik.
Pikkorissarnermi innuttaasunullu tamanut ammasumik aggersaanermi peqataasimasunut tamanut qujavugut.
