Ulloq 29. maj 2026 Qeqertalik Business Council & Destination Diskobay A/S Aasianni nalinginnaasumik ataatsimeersuartitsivoq.
Ataatsimeersuarnermi Hanne Kristiansen siulersuisut siulittaasuattut qinigaaqqippoq, Julia Parsilu siulittaasup tulliatut qinigaaqqilluni. Siulersuisut katitigaanerat ima isikkoqalerpoq:
- Hanne Kristiansen, siulersuisut siulittaasuat
- Julia Pars, siulittaasup tullia
- Hans Aronsen, piginnittut toqqangaasa pingajuat
- Søren Hansen, GE-p immikkoortortaqarfianit Aasiaat/Kangaatsiaq ilaasortaq
- Hans Arkalo Lyberth-Didriksen, GE-p immikkoortortaqarfianit Qasigiannguit ilaasortaq
- Danny Mølgaard, GE-p immikkoortortaqarfianit Qeqertarsuaq sinniisoq
2025-mi suliat amerlasuut
Ataatsimeersuarnermi 2025-mut ukiumoortumik nalunaarusiaq saqqummiunneqarpoq akuersissutigineqarlunilu. Ukioq suliffeqarfimmut ulapaarfiusimavoq, Kommune Qeqertalimmi tamarmi inuussutissarsiornermik ineriartortitsineq, siunnersuineq, piginnaasanik ineriartortitsineq kiisalu takornariaqarnermik ineriartortitsineq pingaartinneqarsimallutik.
Ukioq ingerlanerani suliffeqarfik Nalik Ventures, Sulisitsisut Peqatigiiffiat kiisalu Grønlandsbanken suleqatigalugit nunap immikkoortuani arlaleriarluni angalavoq. Angalanerni siunertaavoq inuussutissarsiortunik naapitsineq, oqaloqateqarneq aammalu suliffeqarfinnut ineriartortitsinissamut pitsaasunik atugassaqartitsinissaq.
Tamatuma saniatigut nutaamik takornariaqarnermut inatsisissaq, takornariaqarnermik ineriartortitsineq kiisalu nunap immikkoortuani nunap immikkoortuani allannguttaaliugassatut pilersaarutigineqartoq pillugu workshoppertitsinerit innuttaasunillu ataatsimiisitsinerit ingerlanneqarsimapput.
Ineriartortitsineq periarfissallu nutaat
2026-mut siulersuisut allattoqarfianniillu qilanaaruteqarput, tassani suliniutit annertunerusut ingerlateqqinneqassapput. Suliniutit pingaarnerit ilagaat inuussutissarsiornermik ineriartortitsinissamut suliniutit angisuut kiisalu nunap immikkoortuani allannguttaaliugassatut pilersaarutip pilersinneqarnissaanut tapersersuineq.
Ataatsimeersuarnermi aammattaaq Aasianni inuussutissarsiortut unammilligassaasa ilaat annertuut eqqartorneqarput. Polar Raajaap raajaleriffiata ukioq manna kingusinnerusukkut matunissaa naatsorsuutigineqarpoq, tamannalu suliffissanut kiisalu illoqarfimmi aningaasaqarnermut annertuumik sunniuteqarsinnaavoq.
Taamaattumik Qeqertalik Business Council & Destination Diskobay A/S Kommune Qeqertalimmi inuussutissarsiornermik ineriartortitsinermik, suliffissanik nutaanik pilersitsinissamik aammalu inuussutissarsiutinik piujuartitsisumik nukittuumillu ineriartortitsinissamik suliaqarnini ingerlatiinnassavaa.
Qujanaq suleqatigiinnermut
Siulersuisut, suleqatit, Kommune Qeqertalik, inuussutissarsiortut kiisalu soqutigisaqaqatigiit tamaasa ukiumi qaangiuttumi suleqatigiilluarsimanermut qutsavigineqarput.
Peqatigiilluta Kommune Qeqertalimmi ineriartortitsineq, siuariartorneq periarfissallu nutaat sulissutigiuassavagut.