Qeqertalik Business Council dronepilot.gl peqatingalugu dronemik aqutsinissamik pikkorissaatitseqqammerpoq, inummut ataatsimut peqataanissamut akiliut 5.000 koruuneqarluni, inuussutissarsiutitigut siunnersuisoqarfiup peqataanissamut tapiutaa 3.000 koruuniusoq ilanngaatingereerlugu.

Aatsaat siullerpaamik Aasianni dronemik aqutsinissamik pikkorissaatitsisoqarpoq, tamannalu soqutigineqarluavissimavoq. Akiliillutik pikkorissartut 16-t peqataapput Kangaatsiamiit, Qasigiannguaniit Aasianniillu. Tassanilu pisortat suliffeqarfiillu namminersortut peqataatitsillutik, dronemik aqutsinissamik soqutigisaqarlutik oqartussaniit pisariaqartunik akuersissuteqalerlutik illoqarfiup iluani timmisinnaanngortitsipput.

”Drone atorlugu timmisinnaanermut pikkorissaaneq naleqqulluinnarsoraara, tassami suliffeqarfinnit aamma atorneqalerattuinnarput, soorlu uagut suliffeqarfitsinni. Inatsisit atuuttut ilisimaqarneruffiginerulersimavakka, kiisalu peqataasut pikkorissaasullu akornanni misilittakkatsinnik avitseqatigiilluarsimalluta. Ilinniagaq una suliffitsinni sanaartornermi pitsaassutsikkut nakkutilliinissamut, nalunaarsuinissamut, siorna kingornalu ineriartorneranut immiussinermut, minnerunngitsumillu suliffitsinnik nittarsaassinissamut atorluarsinnaakuttoorpara.” Taama oqarpoq Erik Lynge Rasmussen, KJ Greenlandimiit peqataasoq.

Qeqertalimmi immikkoortortaqarfitta nittarsaanneqarnissaanut akisussaasoq Destination Manageri, Linda Kleist ima oqarpoq: ”Neriuutingaarput drone atorlugu pikkorissartut najungaqarfitsik kusanartumik orniginartumillu avammut nittarsaallualersinnaassagaat. Taama isiornikkullu tikeraarusussinnaasunut annertunerusumik peqqutissaqalersitsillutillu immikkoortortaqarfitsinnut tikeraarusunnerulersitsisinnaassasut”.