Destination Diskobayimi pisortaq, Gerth P. Olsen, umiarsuaq takornariartaat M/S Maud ullumikkut Nuummiit ilaaffigissallugu ikiffigissavaa.
Destination Diskobay nunatsinni takornariaqartitsinermik suliallit allat peqatingalugit, AECO-mit (The Association of Arctic Expedition Cruise Operators) Hurtigruten suleqatiginerisigut, nunatta sineriaani takornarissat allat ilangalugit angalanissamut qaaqquneqarsimapput.
Umiarsuarmi takornariartaammi nunatsinniit angalaqataasut, takornarissatut allatuulli nunatsinni umiarsuarmi takornariartaammi angalaneq qanoq innersoq misigisaqarfigissavaat, peqataasut imminnut suliffeqarfimminnillu ilisarititsissapput, taamaasillutillu tunuliaqutiminnut tunngasunik paasisaqarnerulerlutillu, AECO-mi umiarsuit takornariartaassuit ilaasortaasut peqatingalugit piujuaannartitsinissaq eqqarsaatingalugu siunissamut ineriartortitsinissaq sulissutigissavaat.
”Takornariaqarnermik siuarsaanissamik suliaqarluni taama periarfissatsialammik annertutigisumik tunineqarluni imaannaanngilaq, tamannalu sapinngisatsinnik atorluarnissaa, ilisimaqarlualernissaq, attaveqaatinillu qaninnerulersitsinissaa, kiisalu takornariaqarnermi siunissamut piujuaannartitsineq qitiutinnerullugu suliaqarnerulersitsinissaa neriuutiginarpoq” taama oqarpoq Gerth P. Olsen.
Umiarsuaq takornariartaat norskinik Hurtigrutenimit pigineqartoq avannamut sapaatip akunneranik sivisussusilimmik, Uummannamut utimullu ingerlaassaaq. Nunatsinniillu peqataasut naatsorsuutingaat sumiiffiit piffissallu ataani allaqqasut tikissallugit:
- Nuuk 26/7 aallassapput kl. 8
- Maniitsoq 26/7 kl. 14-20
- Sisimiut 27/7 kl. 8-20
- Qeqertarsuaq 28/7 kl. 8-18
- Uummannaq 29/7 kl. 9-21
- Vaigat 30/7
- Ilulissat 31/7 kl. 7-16
- Kangerlussuatsiaq/Evighedsfjorden 1/8 kl. 14:30-21:30 Nuuk 2/8 kl. 10-18