Qaammatit pingasukkaarlugit Aasianni inuussutissarsiuteqarnikkut ingerlatsisut, Kommune Qeqertalimmi aqutsisut kiisalu Qeqertalik Business Council ataatsimiittarput.
Tassani peqataasut pilersaarutiminnik, suliniutiminnik ilaalu ilanngullit akunnerminni paasissutissiiffeqatigiittarput, taamaalillutik pineqartut ataatsimoorlutik illoqarfimminni inuussutissarsiuteqarnikkut takornariaqarnikkullu soqutigisaminnik kivitseqatigiissinnaasarlutik.
Sulisitsisuni nunap immikkoortuani Qeqertarsuup tunuani siulittaasoq Søren Hansen, ataatsimiisitsisarneq taama ittoq pillugu ima oqaaseqarpoq:
’’Nunap immikkoortuani inuussutissarsiuteqarnerup ineriartortinneqarnerani, Qeqertalik Business Council pingaarutilimmik atuuffeqarpoq. Siuarsaanissamut, nutaaliornermut aammalu suleqatigiinnermut pisussaaffigilluinnarlugu suliniuteqartarnermigut, suliffeqarfiit nukittunerulernissaannut najukkamilu inuiaqatigiinni piujuartitsinerulernissamut taperseeqataasarpoq. Inuussutissarsiornerup iluani pineqartut tamarmik assigiimmik uummaarissumillu ingerlanissaasa periarfissinneqarnissaannut, kinaassusersiunngitsumik periuseqartarnera qulakkeerinnittuuvoq. Qeqertalimmilu inuussutissarsiuteqarnikkut nukittorsaaniarlutik aallussinerat naleqarluartumillu suliniarnerat, Sulisitsisut tungaanniik qujamasuutigeqaarput.’’
Assimi siullermi Søren Hansen takusinnaavat.
Assip aappaani Sulisitsisuni nunap immikkoortuani Qeqertarsuup tunuani ilaasortat, saamianiit Rina Reimer Madsen – Aasiaat Olie, Nivi Nielsen Zeeb – Grønlandsbanken, Søren Hansen – Sulisitsisuni nunap immikkoortuani Qeqertarsuup tunuani siulittaasoq, aamma Josefine Toxen Worm – Masanti. Assimi ilaanngillat Jens Jensen – KJ GREENLAND aamma Hans Arkalo Lyberth-Didriksen – Autoværksted, Rør/auto Asaasut.
Suliniut taanna inuussutissarsiutitigut siunnersuisoqarfiup Qeqertalik Business Councilip siuttuuffigilernikuusani kissaatigisorujussuuaa illoqarfiit sinnerini aamma najukkami sinniisuutitat qanimut suleqatigalugit pilersinneqassasoq.
Ataatsimiinnerit taakku najukkami suliniutiginiakkat siumut ingerlanneqarnissaannut aalajangiisuusarput, tamannalu aamma Sulisitsisut nunap immikkoortuani immikkoortortaqarfimmini iluatsittumik ingerlanissamut qitiulluinnartutut naqissuserpaa.
