Qeqertalik Business Council A/S siulersuisunik ilisarititsineq.

Inuussutissarsiutitigut Siunnersuisoqarfiup siulersuisui arfinilinnik ilaasortaatitaqarpoq. Siulersuisut ukiumut minnerpaamik sisamariarlutik ataatsimiittarput, ataatsimiinnerit assigiinngitsunik qulequtalersukkat ilaatigut tassaasut; Aningaasaqarneq Periusissiamillu ingerlatsineq; Ataatsimeersuarneq; Temamik sammasisaqarluni ataatsimiinneq kiisalu ukiumoortumik Killiffissiuineq. Taakkualu saniatigut siulittaasoq tullersortaalu ataavartumik sulianik malinnaatinneqartarlutik.

Siulersuisut pingaartitarivaat Kommune Qeqertalimmi najungaqarfiit tamarmik orninneqartarnissaat aammalu takornarialerinermik inuussutissarsiuteqarnermillu piujuaannartitsineq eqqarsaatigalugu siuarsaasuaannartoqarnissaa.

Ukiumoortumik kommuneqarfitsinni illoqarfiit paarlakaattumik tikeraartarpaat, soorlu Aasianni, Qasigiannguani Qeqertarsuarmilu inuussutissarsiuteqarnermik takornariaqarnermillu sulialinnik naapeqateqareersimasut, suliaannik pilersaarutaannillu saqqummiivigineqarsimallutik, matumanilu ukialerpat Kangaatsiami ataatsimiinneq ingerlanneqassamaarluni.

“Sumiiffimmi inuussutissarsiuteqartut qanimut naapilluartarneri kiisalu suliaannik saqqummiivigineqartarnerput isummersorfiullunilu nuannaarutigisaqaarput, kommuneqarfitsinni takornarissanut tunniussinnaasaannik inuussutissarsiutitigullu neqeroorutaannik paasisaqarluartaqaagut, tamakkulu tamarmik inuiaqatigiinnik nukittorsaataaqataalluarumaarput” Siulittaasoq Hanne Kristiansen taama naggasiivoq.